“Қора дайжест”: 2023 йил 28 ноябрь воқеалари

28 ноябрда бўлиб ўтган кўнгилсиз воқеалар хроникаси билан танишинг.

Тошкентда ўқувчи вафот этди

Тошкент шаҳри, Мирзо Улуғбек туманидаги 99-сонли мактабнинг 8-синф ўқувчиси соат тахминан 18:15да мактаб ҳовлисида ҳушидан кетиб, йиқилган. Мактаб қоровули томонидан тез ёрдам чақиртирилган ва ўқувчи 15 дақиқада 15-сонли Республика кардиология марказига етказилган. Шифокорлар томонидан кўрсатилган тиббий муолажаларга қарамай, бола шифохонада вафот этган. 

СТЭнинг тиббий хулосасига кўра, у электр токи уриши натижасида вафот этгани айтилмоқда. Бироқ Мактабгача ва мактаб таълими бўлими берган изоҳга кўра мактаб ҳовлиси ҳудудида электр ўтказувчи симлар ўтказилмагани, бола йиқилган ҳолда ҳушдан кетгани сабаб қилиб кўрсатилган. Ҳозирда ҳолат юзасидан суриштирув ишлари олиб борилмоқда.

Метродаги суицид

Тошкент метрополитенидаги "Қўйлиқ" бекатида эркак ҳаракатланиб келаётган метро поезди йўлига сакраб ўз жонига қасд қилишга уринган. Воқеа бугун, 28 ноябрь 14:58да содир бўлган. Шу сабабли "Ерусти ҳалқа йўли"нинг бир қисмида вақтинчалик ҳаракатланиш тўхтатилган.

ИИВ биноси тутун ичида қолди

28 ноябрь куни эрталаб Космонавтлар метро бекати олдида ёнғин содир бўлган. Кучли тутун Ички ишлар вазирлиги биносини ўраб олган. Ёнғин содир бўлган радиусдаги аҳоли уйларини тарк этишди. Воқеа юзасидан "Ҳудудий электр тармоқлари" АЖнинг изоҳ беришича ҳудуддаги "Сайилгоҳ" подстансиясидан чиқувчи 35 кВ кучланишли кабелларга зарар етган. Бир нечта ўт ўчирувчи машиналар етиб келиб, ёнғинни бартараф этилган. 

"Ушбу нохушлик туфайли барча истеъмолчилар вақтинча бошқа тармоққа ўтказилган, электр токи таъминотидан узулишлар бўйича ҳеч қандай шикоят йўқ, ёнғин сабаблари ўрганилмоқда" — дея изоҳ беради расмийлар.

Туман сабабли ЙТҲ содир бўлди

Фарғона вилояти, Бувайда туманини кесиб ўтувчи “Тошкент-Ўш” автомобил йўлида кучли туман сабаб оралиқ масофани ушлай олмаган машиналар (Cobalt, Hyundai Porter, Nexia-2 ва Tico) тўқнашиб кетди. Оқибатда Tico ҳайдовчиси тан жароҳати олган ва шифохонага мурожаат қилган. 

Воқеа юзасидан ЙҲХБ суриштирув ишларини олиб бормоқда.