Тўдакўл сув омборида замонавий туристик зона очилади

Навоий вилояти, Қизилтепа тумани ҳудудида жойлашган Тўдакўл сув омбори ҳудудида замонавий "Silk Road Family Resort" сайёҳлик пляж зонаси очилади. Бу ҳақида Туризмни ривожлантириш давлат қўмитаси маълум қилди.

Маълумотларга кўра, Тўдакўл сув омбори ҳудудида «Silk Road Family Resort» дам олиш маскани лойиҳасини амалга ошириш ишлари бухоролик тадбиркорлар томонидан амалга оширилган.

Мазкур пляж дам олиш соғломлаштириш маскани ва аквапарк лойиҳасининг умумий қиймати 6 миллион АҚШ долларини ташкил этади. 

Шунингдек, ушбу сайёҳлик объектида пляж, бассейн, аквапарк, кичик «Диснейленд», 50 ўринга мўлжалланган меҳмонхона, дам олиш сўрилари, ресторан, ёзги айвон, табиат қўйнидаги ўйингоҳ, соғломлаштириш маскани, спорт майдони, автотураргоҳ, махсус сув транспортлари ва бошқа сервис хизматлари ҳам фаолият юритиши айтилмоқда.

Бу ерда очиқ осмон остида ўтказиладиган концерт ва шоу дастурларини қабул қилиш ва ташкил қилиш имконига ҳам мавжуд бўлади.