2030 va 2034-yilgi Mundial mezbonlarining nomi ma’lum bo‘ldi

Bugun FIFA kongresida futbol bo‘yicha 2030 va 2034-yilgi Jahon Chempionati mezbonlari nomi e’lon qilindi. 2030-yilda futbol bo‘yicha Jahon Chempionatining ilk marta o‘tkazilganiga 100 yil to‘ladi.

Jahon Chempionati-2030

FIFA tomonidan JCH-2030 Marokash, Portugaliya va Ispaniyada o‘tkaziladi. Shuningdek, uchta o‘yin Janubiy Amerikada – Urugvay, Paragvay va Argentinada tashkil etilishi tasdiqlandi. , futbol bo‘yicha Jahon Chempionati ilk marta uchta qit’a va olti davlatda o‘tkaziladi. Chempionatning asosiy o‘yinlari Marokash, Ispaniya va Portugaliyada o‘tkaziladi. Ochilish o‘yini Urugvayda bo‘lib o‘tib, unda mezbon mamlakat milliy jamoasi ishtirok etadi. Shuningdek, Argentina va Paragvay milliy jamoalari ham o‘z guruhlaridagi ilk o‘yinlarni muxlislari qarshisida o‘tkazadi.

Jahon Chempionati-2034

2034-yilgi Jahon Chempionatiga esa Saudiya Arabistoni mezbonlik qilishi rasman e’lon qilindi. Qatar-2022da bo‘lgani kabi Saudiyada o‘tadigan mundial ham mintaqaning iqlim sharoitdan kelib chiqqan holda qishda bo‘lib o‘tadi. Ma’lumot uchun, Italiyaning Saudiya Arabistoni va Misr bilan birgalikda 2030-yilgi jahon chempionatiga mezbonlik qilish uchun ariza topshirishdan bosh tortgani ma’lum bo‘lgan edi. Shu sababli, 2030-yil uchun Marokash, Portugaliya va Ispaniyaning qo‘shma arizasi yagona bo‘lib qoldi, 2034-yilgi Mundial esa Saudiya Arabistoniga topshirildi.

Yana bir qishki musobaqa

The Sun nashri xabariga ko‘ra, Saudiya Arabistonida 2034 yilgi Jahon Chempionati yanvar oyida o‘tkazilishi mumkin. Manba xabariga ko‘ra, turnirni yanvar oyida o‘tkazish to‘g‘risidagi qarorga mamlakatda yozda havo haroratining yuqori bo‘lishi, ba’zan 45 darajagacha ko‘tarilishi, shuningdek, 2034-yilda Ramazon diniy bayramining o‘tkazilishi ta’sir qilishi mumkin, uning jadvali iyun oyidagi Jahon Chempionati jadvali bilan kesishishi mumkin. 

Qayd etish joiz, 2030-yilda futbol bo‘yicha Jahon Chempionatining ilk marta o‘tkazilganiga 100 yil to‘ladi. Birinchi Jahon Chempionati 1930-yil Urugvayda o‘tkazilgan edi. Shu bois turnirning ochilish o‘yini ramziy ma’noda ushbu mamlakatga topshirilgan.