Мисрдан яна 78 нафар ўзбекистонлик олиб келинди

Мисрнинг «AMC AIRLINES» авиакомпаниясига тегишли самолётда ташкил қилинган чартер рейс билан ўзбекистонлик ватандошлар қайтарилди. Бу ҳақида “Дунё” АА хабар берди.

Миср пойтахти Қоҳира шаҳридан парвоз қилган самолётда жами 78 нафар Ўзбекистон фуқароси Тошкентга олиб келинган.

Ўзбекистоннинг Саудия Арабистони ва Мисрдаги элчихоналари ҳамкорлигида ташкил этилган рейсда Миср аэропортида турли давлатлардан келган, жумладан, Ямандан 55 нафар, Мисрдан 8 нафар, Ироқдан 4 нафар, Саудия Арабистонидан 3 нафар, Баҳрайндан 3 нафар, Австралиядан 3 нафар, Иордания ва Сенегалдан 1 нафардан Ўзбекистон фуқаролари бор. Йўловчилар орасида Ўзбекистонга таклиф этилган мисрлик мутахассислар ҳам борлиги айтилмоқда.

Эслатиб ўтамиз, чартер рейсда келган барча йўловчилар ўрнатилган тартибда махсус карантин ҳудудларида ва меҳмонхоналарда карантин муддатларини ўташади.