Rossiyada migrantlarga oilasi bilan yashashning minimal narxi belgilab qo‘yildi

Rossiya Federatsiyasi Prezidenti Vladimir Putin xorijiy fuqarolarning mamlakatdagi huquqiy maqomini tartibga soluvchi qonunchilikka kiritilgan yangi tuzatishlarni tasdiqladi. Ushbu hujjat Rossiya hududida faoliyat yuritayotgan xorijlik ishchilar, ularning daromad darajasi hamda oila a’zolarini ta’minlash majburiyatlariga taalluqli muhim o‘zgarishlarni nazarda tutadi.

Yashash minimumi boyicha yangi mezonlar

Yangi tartibga ko‘ra, mehnat migrantlari zimmasiga nafaqat o‘zini, balki Rossiyada birga yashayotgan va ularning qaramog‘ida bo‘lgan oila a’zolarini ham yetarli mablag‘ bilan ta’minlash majburiyati yuklatiladi. Har bir shaxsga to‘g‘ri keladigan daromad miqdori ular istiqomat qilayotgan hududda belgilangan rasmiy yashash minimumidan kam bo‘lmasligi shart.

Chet el fuqarosi bir vaqtning o‘zida bir nechta mintaqada mehnat faoliyatini olib borayotgan holatda, zaruriy daromad hisob-kitobi eng yuqori yashash minimumi o‘rnatilgan hudud mezonlari asosida amalga oshiriladi. Bundan tashqari, Rossiya subyektlari (mintaqalari) уshbu yashash minimumi miqdoriga qo‘shimcha mintaqaviy koeffitsiyentlarni joriy etish huquqiga ega bo‘ladi.

Mamlakatda qolish shartlari

Belgilangan moliyaviy talablarning bajarilmasligi jiddiy huquqiy oqibatlarga olib keladi. Agarda migrant belgilangan daromad mezonini ta’minlay olmasa, uning ishlash ruxsatnomasi yoki patenti uzaytirib berilmaydi. Hujjat muddati uzaytirilmagan taqdirda, xorijiy fuqaro hamda uning voyaga yetmagan farzandlari qonun bilan belgilangan muddat ichida Rossiya Federatsiyasi hududini tark etishi shart bo‘ladi.

Hujjatda voyaga yetgan farzandlarning maqomi ham alohida belgilangan. Migrantlarning 18 yoshga to‘lgan farzandlari mamlakatda qolish va yashashni davom ettirish uchun mustaqil ravishda qonuniy asoslarni rasmiylashtirishlari yoki alohida mehnat patentini olishlari talab etiladi. Aks holda, ular ham mamlakatni tark etishga majbur bo‘ladi.

Qonunning kuchga kirish muddati

Yangi qonunchilik mehnat migrantlari uchun jismoniy shaxslar daromad solig‘i (JSHDS) bo‘yicha avans to‘lovlarini amalga oshirish qoidalarini ham qat’iylashtiradi. Hujjatga binoan, ayrim toifadagi xorijiy fuqarolar nafaqat o‘zlarining mehnat faoliyatlari uchun, balki Rossiyada ularning qaramog‘ida bo‘lib turgan oila a’zolari uchun ham qo‘shimcha avans soliq to‘lovlarini to‘lashlari shart etib belgilanadi.

Qabul qilingan qonunning asosiy normativ qoidalari 2027-yilning 1-yanvaridan e’tiboran rasman kuchga kiradi. Rossiya Federatsiyasi hukumatining ta’kidlashicha, ushbu qat’iy chora-tadbirlar mamlakatdagi mehnat migratsiyasi jarayonlari ustidan nazoratni samarali tashkil etish, noqonuniy bandlik holatlariga chek qo‘yish hamda davlat byudjetiga soliq tushumlarini oshirishga xizmat qiladi.