Jahon chempionati — iste’dodlar ko‘rgazmasi: Karimov o‘z imkoniyatidan unumli foydalandi

O‘zbekiston milliy terma jamoasining 18 yoshli himoyachisi Behruz Karimov 2026-yilgi jahon chempionatida bosh jamoamizning eng yorqin kashfiyotlaridan biriga aylandi. Kolumbiya va Portugaliyaga qarshi kechgan uchrashuvlardagi mag'lubiyatlarga qaramay, yosh futbolchi xorijlik ekspertlar hamda Yevropa klublari vakillarining e'tiborini tortishga ulgurdi.

“Chelsi” xo‘jayinlariga o‘zbekistonlik iqtidor bilan shartnoma imzolash tavsiya etilmoqda

Karimovga Angliyaning “Chelsi” va Fransiyaning “Strasbur“ klublariga egalik qiluvchi “BlueCo” korporatsiyasi tuzilmalari qiziqish bildirdi. Mazkur kompaniyaga tegishli “BlueCo Xtra” resursi turnir o‘yinlaridan so‘ng rahbariyatga o‘zbekistonlik himoyachiga jiddiy e’tibor qaratishni maslahat berdi.

Nashr mualliflarining fikricha, Karimov zamonaviy qanot himoyachisiga xos bo‘lgan barcha xislatlarga ega va eng yuqori saviyadagi futbolchilarga ham munosib qarshilik ko‘rsatishga qodir.

Nafaqat himoyachi, balki maydondagi yetakchi

Behruzning dunyo birinchiligidagi dastlabki o‘yinlarda qayd etgan statistikasi tahsinga loyiq. U ikki uchrashuv davomida raqibdan to‘pni olib qo‘yish bo‘yicha 15 ta muvaffaqiyatli harakatni amalga oshirdi, 34 ta yakkakurashda qatnashdi va 6 marta raqiblarini aldab o‘tib, bu ko‘rsatkich bo‘yicha O‘zbekiston terma jamoasining eng yaxshi futbolchisiga aylandi.

Mutaxassislar, ayniqsa, uning to‘p bilan ishlashdagi dadilligini, tezkor qaror qabul qila olish qobiliyatini va hujumlarga qo‘shilishga doim tayyor turishini alohida e'tirof etishmoqda.

Jahon futboli yulduzlari qarshisidagi sinov

Jahon chempionatida Karimovga jahon darajasidagi yulduzlarga qarshi maydonga tushish nasib etdi. Kolumbiya va Portugaliyaga qarshi bahslarda u Luis Dias va Nunu Mendesh kabi nomdor o‘yinchilar bilan tinimsiz yakkakurashlarga kirishdi hamda fidoyilik borasida ulardan aslo qolishmadi.

Bundan tashqari, himoyachining Kolumbiya bilan o‘yindagi uzoq masofadan yo‘llagan kuchli zarbasi O‘zbekiston terma jamoasi uchun turnirning eng hayajonli vaziyatlaridan biriga aylanishiga bir baxya qoldi — to‘p darvoza to‘siniga tegib qaytdi.

Yevropaga transfer amalga oshishi mumkinmi?

Hozircha gap faqat ekspertlarning qiziqishi va skautlarning kuzatuvlari haqida ketmoqda, biroq bunday e'tiborning o‘ziyoq yosh futbolchi uchun ulkan yutuqdir. Xorijiy manbalarning xabar berishicha, Yevropa klublari vakillari Karimov ishtirokidagi o‘yinlarni bevosita stadiondan turib kuzatishgan.

Agar himoyachi mana shunday sur'atda o‘sishda davom etsa, uning Yevropa chempionatlaridan biriga ko‘chib o‘tishi yaqin kelajakdagi haqiqatga aylanishi hech gap emas. Bu o‘zbek futboli uchun yangi avlod vakillari jahon arenasida o‘z so‘zini tobora dadil aytayotganining yana bir yorqin isboti bo‘lar edi.

Yangi avlod timsoli

Behruz Karimov Toshkentdagi Respublika olimpiya zaxiralari kolleji tarbiyalanuvchisi hisoblanadi va 2025-yilning boshidan buyon “Surxon” klubi sharafini himoya qilib kelmoqda. Bugun uning ismi nafaqat O‘zbekistonda, balki mamlakat tashqarisida ham bot-bot tilga olinmoqda.

Jahon chempionati shuni ko‘rsatdiki, O‘zbekiston terma jamoasida Yevropaning yetakchi klublari e'tiborini tortishga qodir yangi avlod shakllanmoqda. Behruz Karimov esa allaqachon ushbu to‘lqinning eng yorqin vakillaridan biri sifatida ko‘zga tashlanmoqda.