“Ronalduga zarracha joy bersangiz bo‘ldi — tamom bo‘lasiz”: Kannavaro O‘zbekistonning yirik hisobdagi mag‘lubiyatini izohladi

O‘zbekiston milliy terma jamoasi bosh murabbiyi Fabio Kannavaro jahon chempionatida Portugaliyadan qabul qilingan alamli mag‘lubiyatdan (0:5) so‘ng o‘z fikrlari bilan o‘rtoqlashdi. U shogirdlari butunlay boshqa klassdagi raqibga duch kelganini yashirmadi.

Kannavaroning ta’kidlashicha, uchrashuv taqdiri ko‘p jihatdan bahsning dastlabki daqiqalaridayoq hal bo‘lgan. Tezkor o‘tkazib yuborilgan gollar o‘zbekistonlik futbolchilarning ruhiyatiga og‘ir zarba bergan bo‘lsa, hisobga olinmagan gol jamoani ruhiy ustunlikdan butunlay mahrum qilgan.

“Ronalduga zarracha joy bersangiz bo‘ldi — tamom bo‘lasiz”

Italiyalik mutaxassis o‘yinda dubl qayd etib, uchrashuv qahramoniga aylangan Krishtianu Ronalduga alohida to‘xtalib o‘tdi.

Kannavaro hali o‘yin boshlanishidan oldinroq shogirdlarini Portugaliya terma jamoasi yulduzidan keladigan xavfdan ogohlantirganini aytdi.

“Men yigitlarga aytgandim, agar Krishtianu Ronalduga maydonda zarracha bo‘lsa ham bo‘sh joy bersak — tamom bo‘lamiz. Amalda ham shunday bo‘ldi. U ikkita gol urdi. Butun jamoa u uchun o‘ynaydi, Ronalduning o‘zi esa hozir jarima maydonchasi ichida nihoyatda aqlli harakat qilyapti”, — dedi murabbiy.

Ronaldu jahon chempionatlari tarixini yangiladi

O‘zbekistonga qarshi kechgan ushbu bahs Portugaliya terma jamoasi sardori uchun tarixiy voqeaga aylandi.

41 yoshli hujumchi erkaklar futboli tarixida ketma-ket oltita jahon chempionatida gol urishga muvaffaq bo‘lgan ilk futbolchi bo‘ldi. Bundan tashqari, u afsonaviy Eysebiodan o‘zib ketib, mundiallardagi gollari sonini 10 taga yetkazdi va Portugaliya tarixidagi eng yaxshi to‘purarga aylandi.

Ushbu muvaffaqiyat so‘nggi kunlarda forvard shifasiga yog‘ilgan tanqidlar to‘lqinidan keyin o‘ziga xos ramziy ma’no kasb etdi.

Kannavaro Ronaldudan faoliyatini yakunlamaslikni so‘radi

Hakamning yakuniy hushtagidan so‘ng Kannavaro portugaliyalik yulduz bilan shaxsan suhbatlashdi va undan futboldan ketishga shoshilmaslikni iltimos qilganini tan oldi.

O‘zbekiston bosh murabbiyining so‘zlariga ko‘ra, Ronaldu 41 yoshida ham professionallik va futbolga bo‘lgan cheksiz muhabbatning noyob namunasi bo‘lib qolmoqda.

“U allaqachon futbol tarixiga o‘z nomini oltin harflar bilan yozib bo‘lgan va mangu afsona bo‘lib qoladi. Shunga qaramay, u hamon maydonda bor vujudi bilan, ulkan ishtiyoq bilan o‘ynayapti. Men unga: ‘Yana bir necha yil o‘yna, futboldan zavq ol’, dedim. Unga bir qarang — jismoniy holati a’lo darajada. Uni yana uzoq vaqt maydonlarda ko‘rishga umid qilaman”, — deya ta’kidladi Kannavaro.

O‘zbekistonda hali imkoniyat bor

Yirik hisobdagi mag‘lubiyatga qaramay, O‘zbekiston milliy terma jamoasi jahon chempionatining pley-off bosqichiga chiqish uchun matematik imkoniyatlarini hali butunlay yo‘qotgani yo‘q. Biroq, Portugaliyadan qabul qilingan zarbadan so‘ng, jamoaning guruhdagi holati ancha murakkablashdi. Endi hamyurtlarimizning keyingi taqdiri faqat o‘zlarining natijalariga emas, balki guruhdagi raqiblarning o‘yinlariga ham bog‘liq bo‘ladi.