Парижда Жерар Депардье иштирокидаги «Mon rêve ouzbek» фильми эфирга узатилди

Франциянинг «Paris Première» телеканалида таниқли кино юлдузи Жерар Депардье иштирокидаги «Mon rêve ouzbek» (“Менинг ўзбекча орзуим”) номли ҳужжатли фильм премьераси бўлиб ўтди.

Унда актёр Ўзбекистон ҳақидаги фикр билдираркан “Ўзбекистон ўзининг ноёб географик ўрни билан алоҳида эътиборга лойиқдир. Марказий Осиёнинг қоқ юрагида жойлашган бу мамлакат турли маданиятларга оид кўплаб анъаналарни ўзида мужассам этган”, дея таъкидлайди.

Фильм Ўзбекистоннинг сайёҳлик салоҳиятини Франция телеканалларида кенг тарғиб қилиш ва хорижда Ўзбекистоннинг ижобий имижини ошириш мақсадида Ўзбекистон Республикасининг Франциядаги элчихонаси, Туризмни ривожлантириш давлат қўмитаси ҳамда «B-Tween» кинокомпанияси ҳамкорлигида 2019 йил Тошкент, Самарқанд, Бухоро, Хива, Термиз ва Нукус шаҳарларида суратга олинган.

Фильмда Ўзбекистоннинг бой маданий мероси, қадриятлари ўз ифодасини топади.