O‘zbekiston mobil internet tezligi borasida Qozog'istondan 20 "qadam" ortda

Mamlakatimizda yanvar oyida mobil internet orqali o‘rtacha yuklab olish tezligi 26,97 Mbit/s, yuklash tezligi esa 11,25 Mbit/s ni tashkil qilgan. Simli internet tezligi o‘rtacha 59,07 Mbit/s ni qayd etgan.Yanvar oyida O‘zbekiston mobil internet tezligi bo‘yicha dunyoning 144 mamlakati ichida 91-o‘rinni egalladi.

Reytingda siljish bor

2023-yilning dekabr oyi bilan solishtirganda O‘zbekiston internet tezligi reytingida to‘rt pog‘ona ko‘tarilgan bo'lib, mamlakatda yanvar oyida mobil internet orqali o‘rtacha yuklab olish tezligi 26,97 Mbit/s, yuklash tezligi esa 11,25 Mbit/s ni tashkil qilgan. Simli internet tezligi esa o‘rtacha 59,07 Mbit/s ni tashkil etgan va bu borada mamlakatimiz reytingda bir pog‘ona yuqorilab, 89-o‘rindan joy olgan.

Markaziy Osiyoda vaziyat qanday?

Ushbu reytingga Markaziy Osiyo davlatlari miqyosida nazar tashlasak, Qozog‘iston yanvar oyida mobil internet tezligi bo‘yicha mintaqada birinchi o‘rinni egallagan (umumiy reytingda 69-o‘rin). Qirg‘iziston uchinchi (94-o‘rin), Tojikiston to‘rtinchi (140-o‘rin) bo‘lgan. Afsuski, Turkmaniston bo‘yicha bu borada ma’lumot mavjud emas. 

O‘zbekistonda internet tezligi

2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgan edi. Vazirning so'zlariga ko'ra, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.

Qiyoslash maqsadida

Taqqoslash uchun O'zbekiston Respublikasi 2022-yilda dunyodagi simli internet tezligi bo‘yicha reytingda 155-o‘rinda bo‘lgan. 2023-yilda esa natijalar o‘zgarib, 131-o‘ringa ko‘tarilgan. Yaʼni o‘tgan yilgi reytingga nisbatan 24 pog‘onaga o‘sish bo‘lgan. O‘zbekistondagi simli internet tezligi 21,67 Mbit/s ekani qayd etilgan. Shuningdek, bundan avval O‘zbekistonda 2023-yil mart oyidan boshlab mobil internet tezligi oshirilishi va mamlakat bo‘ylab 5G texnologiyasi joriy etilishi to‘g‘risida xabar berilgan edi.