Дарсхонами, музхона: масъуллар қаерда?

Бугун ижтимоий тармоқларда мактабларни иситиш ҳали бошланмади, боламни юбормадим қабилида хабарлар тарқала бошлади. Бу гапларда жон бор, албатта. Негаки, ҳаво ҳарорати бирдан пасайди, одамлар орасида эса ЎРВИ ҳали-ҳануз “изғиб юрибди”. Касалланаётганларнинг аксарияти ёшлар бўлгани боис ота-оналарда хавотир уйғониши табиий.

Бироқ ўқувчиларнинг “сабабсиз” дарс қолдириши мумкин эмас, аммо совуқ хонага болани юбориб ҳам бўлмайди. Хўш, ўзи синфхоналарда ҳарорат нормаси қанча? Мактаб совуқ бўлса, кимга мурожаат қилиш керак?

Ҳарорат неча градус бўлиши керак?

Санитария-эпидемиология хизматидан олинган маълумотларга кўра, таълим муассасаларининг ўқув хоналарида машғулотлар ўтказишда меҳнатни муҳофаза қилиш талабларига мувофиқ, ўқув хоналарида ҳаво ҳарорати енгил жисмоний ишда 21º C, ўртача оғир ишда 17º C ва оғир ишда 16º C дан паст бўлмаслиги керак.

Шунингдек, таълим муассасидаги айрим хоналар ҳарорати қуйидагича бўлиши лозим:

➖Спорт залида мунтазам равишда ҳарорат 18º C – 20º C, ҳавонинг намлиги 50 – 60 фоиз;

➖Физика ўқув лаборатория хонасида мунтазам равишда ҳарорат 18º C – 21º C, ҳавонинг намлиги 40 – 60 фоиз бўлиши керак.

Мактаб совуқ бўлса, кимга мурожаат қилиш керак?

Мактаб совуқ бўлса кимга мурожаат қилиш керак? Ушбу савол билан Мактабгача ва мактаб таълим вазирлиги матбуот хизматига мурожаат қилдик. 

Айтилишича, мактабларда иситиш тизимининг куз-қиш мавсумида барқарор ишлашига маҳаллий ҳокимликлар масъул. Шу боисдан ота-оналарга агар мактаб иситиш тизимида муаммо бўлса, вазирликнинг ҳудудий штабларига мурожаат қилишлари мумкинлигини маълум қиламиз.