Husanov – 119 million yevro

O‘zbekiston milliy terma jamoasi va Angliyaning “Manchester Siti” klubi himoyachisi Abduqodir Husanov global futbol hamjamiyatining e’tiborini o‘ziga qaratishda davom etmoqda. Nufuzli FMInside portali tomonidan e’lon qilingan 2026-yilning eng istiqbolli yosh futbolchilari reytingida hamyurtimiz dunyoning eng qimmat va iqtidorli yosh o‘yinchilari bilan bir qatorda tilga olindi.

Jahon darajasidagi e’tirof

Tahlilchilar 21 yoshli o‘zbekistonlik futbolchining salohiyatini juda yuqori baholashmoqda. Reytingga ko‘ra, Husanovning hozirgi qobiliyati 75 ballga loyiq ko‘rilgan bo‘lsa, uning kelajakdagi potensial imkoniyatlari 87 ballni tashkil etadi. Bu ko‘rsatkichlar uni “Barselona“ vingeri Lamine Yamal, PSJ yarimhimoyachilari Joau Nevesh va Uoren Zair-Emeri kabi Yevropa futbolining yorqin yulduzlari bilan bir qatorda turishini ta’minladi.

Shuningdek, mazkur ro‘yxatdan PSJ vakili Dizere Due, “Yuventus” hujumchisi Kenan Yildiz, “Komo” klubi a’zosi Niko Paz hamda “Barselona”ning iqtidorli yoshlari Gavi va Pau Kubarsi kabi nomlar ham o‘rin olgan. E’tiborli tomoni shundaki, Husanovning reytingi “Bavariya” klubi yarimhimoyachisi Aleksandr Pavlovich va uning “Manchester Siti”dagi jamoadoshi Niko Orayli kabi o‘yinchilardan yuqoriroq baholangan.

Transfer qiymati va kelajak istiqbollari

FMInside mutaxassislari Abduqodir Husanovning transfer qiymatini rekord darajadagi 119 million yevrogacha baholashdi. Tahlillarga ko‘ra, futbolchining qiymati 63 million yevrodan boshlanib, 119 million yevrogacha yetishi mumkin. Hozirgi kunda “Manchester Siti” bilan 2029-yilning iyuniga qadar mo‘ljallangan amaldagi shartnomasi bo‘yicha himoyachining haftalik maoshi 93 ming yevroni tashkil etadi.

Ushbu statistika va ekspertlarning ijobiy baholari Husanovning nafaqat O‘zbekiston, balki jahon miqyosidagi markaziy himoyachilar orasida o‘z o‘rnini topib ulgurganidan dalolat beradi. Yosh futbolchining “Manchester Siti” kabi top-klub safida bunday yuksak natijalarni qayd etayotgani uning kelajakda dunyoning eng yaxshi himoyachilaridan biriga aylanishi mumkinligini anglatadi.