“O‘zbekiston elitasi”ga qarshi ayblovlar e’lon qilindi: Humans hukumatdan yuz millionlab dollar talab qilmoqda

O‘zbekistonning raqamli bozoridagi yirik ishtirokchilardan biri bo‘lgan Humans Group xalqaro xoldingi tarkibiga kiruvchi hamda O‘zbekistondagi Humans biznesiga egalik qiluvchi Singapurning “Humans Mobile Ltd.” kompaniyasi va O‘zbekiston hukumati o‘rtasidagi investitsiyaviy nizo rasmiy arbitraj bosqichiga qadam qo‘ydi. Jahon banki huzuridagi Investitsiya nizolarini hal qilish bo‘yicha xalqaro markaz (INHQXM) mazkur ish bo‘yicha tribunalni shakllantirdi, deb xabar bermoqda Spot.

Nizo markazida – 20 yillik davlatlararo bitim

Nizoning huquqiy asosi sifatida 2003-yilda O‘zbekiston va Singapur o‘rtasida imzolangan investitsiyalarni o‘zaro rag‘batlantirish va himoya qilish to‘g‘risidagi bitim ko‘rsatilmoqda. Da’vogar tomonning iddaosiga ko‘ra, O‘zbekiston ushbu xalqaro shartnoma bo‘yicha o‘z zimmasiga olgan majburiyatlarni buzgan.

Arbitraj tribunali tarkibi va himoyachilar

Joriy yilning 7-yanvarida ishni ko‘rib chiquvchi uch nafar nufuzli arbitrdan iborat hay’at tasdiqlandi:

• Ser Deniyel Betlexem (Daniel Bethlehem) – Tribunal raisi;
• Anna Xoffman (Anne Hoffmann) – Humans tomonidan tayinlangan arbitr;
• Xorxe E. Vinuales (Jorge E. Viñuales) – O‘zbekiston hukumati tomonidan tayinlangan arbitr.

Tomonlarning manfaatlarini dunyoga mashhur yuridik gigantlar himoya qilmoqda: Humans uchun Peter & Kim firmasi, O‘zbekiston manfaatlari uchun esa Curtis Mallet-Prevost Colt & Mosle firmasi mas'ul etib belgilangan.

Ayblovlar: “Tizimli to‘sqinliklar va zarar”

Kompaniya rahbariyati O‘zbekistonning bir qator davlat tuzilmalari, jumladan, Markaziy bank, O‘zbektelekom, sud va prokuratura organlari, shuningdek, ayrim “hukmron elita vakillari” tomonidan biznesga tizimli bosim o‘tkazilganini da’vo qilmoqda.

“Hukumat harakatlari bizning shiddatli o‘sishimizga to‘sqinlik qildi va sezilarli zarar yetkazdi. Biz iqtisodiy yo‘qotishlarimizni qoplash hamda huquqiy aniqlikni tiklash uchun adolatli kompensatsiya talab qilamiz,” — deya ta'kidladi Humans Group asoschisi Vladimir Dobrinin.

Da’vo miqdori va kutilayotgan natijalar

Kompaniya yetkazilgan zararni aniq raqamlarda e’lon qilmagan bo‘lsa-da, gap yuz millionlab AQSh dollari haqida ketayotganini bildirdi. 20-yanvar kuni Humans ish yakunlanmaguncha o‘z huquqlarini himoya qilish uchun vaqtinchalik choralar ko‘rishni so‘rab iltimosnoma kiritgan.

Eslatib o‘tamiz, O‘zbekiston 1995-yildagi Vashington konvensiyasiga a’zo hisoblanadi. Bu shuni anglatadiki, ushbu xalqaro arbitraj qarori yakuniy va majburiy kuchga ega bo‘lib, uning ustidan shikoyat qilish imkoniyati mavjud emas.

Hozirda javobgar sifatida Adliya vazirligi huzuridagi O‘zbekiston manfaatlarini huquqiy himoya qilish boshqarmasi ishtirok etmoqda. Mazkur nizo natijasi O‘zbekistonning xalqaro investorlar oldidagi obro‘si va investitsion jozibadorligi uchun muhim indikator bo‘lishi kutilmoqda.