Global isish davom etmoqda

2024-yil mart oyi butun dunyo bo‘ylab kuzatuvlar tarixidagi eng issiq mart bo‘ldi. Meteorologlar ketma-ket o‘ninchi oy harorat rekordini qayd etmoqda. Bu haqda Copernicus (https://climate.copernicus.eu/copernicus-march-2024-tenth-month-row-be-hottest-record) Yevropa iqlim xizmati xabar berdi.

Oldingi rekorddan 0,1 daraja yuqori

Qayd qilinishicha, mart oyida sayyora yuzasida o‘rtacha harorat Syelsiy bo‘yicha 14,14 darajani tashkil etgan — bu 1991 yildan 2020-yilgacha bo‘lgan mart oylaridagi o‘rtacha ko‘rsatkichdan 0,73 darajaga yuqori. Bundan tashqari, bu 2016 yil mart oyi, ya’ni avvalgi rekord qayd etilgan davrga nisbatan ham 0,1 darajaga ko‘p.

Oxirgi 12 oylik 

Oxirgi 12 oy davomidagi (2023-yil aprelidan 2024-yilning martigacha) global o‘rtacha harorat ham tarixdagi eng yuqori ko‘rsatkichga chiqdi. Harorat 1850-1900-yillardagi sanoatgacha bo‘lgan davrga nisbatan 1,58 daraja yuqori bo‘ldi.

“2024-yil mart oyida havo va dengiz yuzasi harorati bo‘yicha qator iqlim rekordlari kuzatilmoqda... Havo isib borishini to‘xtatish uchun issiqxona gazlarining emissiyasini tez sur’atda kamaytirish zarur", – dedi Copernicus direktori o‘rinbosari Samanta Byorjes.

Osiyo bundan mustasnomi?

Yevropadan tashqari Shimoliy Amerika, Grenlandiya, Sharqiy Rossiya, Markaziy Amerika, Janubiy Amerikaning bir qismi, Afrikaning ko‘p qismlari, Avstraliyaning janubi va Antarktidaning ayrim qismlarida o‘rtachadan yuqori harorat qayd etilgan.