“Kimga yoqmasa, o‘qimasin” – Sherzodxon Qudratxo‘ja

Kecha ijtimoiy tarmoqlarda O‘zbekiston Jurnalistika va ommaviy kommunikatsiyalar universiteti binosi kirish qismida turgan talabalar aks etgan video tarqaldi. Ularning so‘zlariga ko‘ra, ular kechikkanliklari hamda belgilangan kiyinish tartibiga rioya qilmagani sababli darslarga kiritilmagan.

Talabalardan biri intervyuda ma’lum qilishicha, u galstuksiz kelgani uchun universitetga kiritilmagan. Uning aytishicha, undan dress-kodga rioya qilish talab qilingan va binoga kirishiga ruxsat berilmagan.

Mazkur holat keng jamoatchilik rezonansiga sabab bo‘ldi. E’lon ostidagi izohlarda ko‘plab foydalanuvchilar kiyim-kechak ta’lim jarayoniga daxldor bo‘lmasligi kerakligini ta’kidlab, darslarga kiritilmaganini adolatsizlik deb baholashdi.

Rektorning pozitsiyasi

Muhokamalardan so‘ng universitet rektori Sherzodxon Qudratxo‘ja keng qamrovli bayonot bilan chiqdi.

Uning so‘zlariga ko‘ra, professor-o‘qituvchilar ishga juda erta — tonggi soat 5–6 lardayoq kelishadi. Shu bois u talabalarning kechikishini hurmatsizlik belgisi deb hisoblaydi.

“Menimcha, bunday masalalar maktabdan, eng avvalo oiladan boshlanadi. Ammo ayrim talabalarimiz populizmga berilib, o‘zlarini qahramon qilib ko‘rsatishga urinishdi.

Birinchidan, oliy ta’lim ishlariga aralashishga kimning haqqi bor? Agar zargar uzuk yasasa, hech kim unga buni qanday qilishni o‘rgatmaydi. Agar kulol ko‘za tayyorlasa, unga ham hech kim maslahat bermaydi. Bugun esa maslahatchilar juda ko‘payib ketgan. Hokimlarga ham, rektorlarga ham maslahat berishadi. Lekin gap hozir bu haqda emas.

E’tibor bering, soat 5:30–6:00 da o‘qituvchilarimiz, ularning ko‘pchiligi ayollar, allaqachon oyoqda bo‘ladi. Ular bolalarini maktabga tayyorlaydi, uy yumushlarini bajaradi va soat 8:00–8:15 ga kelib universitetga yetib keladi. Talaba esa soat 8:30 da keladi, qo‘lida suv yoki fastfud bo‘ladi, uyda nonushta qilishga ulgurmagan va ustki kiyimida kirib keladi. Kechagi yigit ham palto kiygan edi. Undan paltoni yechishni so‘rasangiz, ichidan futbolka chiqadi. U sovqotayotganini aytadi. Ammo umumqabul qilingan jahon madaniyatida inson bino ichiga kirganda ustki kiyimini yechadi.

Bizning axloq kodeksimizda hammasi belgilab qo‘yilgan. Har yili professor-o‘qituvchilar, xodimlar, talabalar va doktorantlar ushbu shartnomani ixtiyoriy ravishda imzolaydi. Hech kim hech kimni majburlamaydi. Kechagi talabalar ham bu shartnomani imzolagan.

Agar kimdadir e’tiroz bo‘lsa, agar universitet bosim o‘tkazmoqda deb hisoblasa, unda o‘qimasin. Ammo yana bir bor ta’kidlayman, universitetimiz liberal va erkin oliygohdir”, — dedi rektor.

Ertasi kuni olingan surat

Voqeadan bir kun o‘tib, ijtimoiy tarmoqlarda ayni talabaning universitet hududida belgilangan forma kiygan holdagi surati paydo bo‘ldi.