Xose Venansio Lopesning tanlovi ma'lum

Osiyo kubogi uchun O‘zbekiston futzal terma jamoasining yakuniy tarkibi e’lon qilindi.

Yakuniy qaydnoma

Xose Venansio Lopes Osiyo kubogi uchun O‘zbekiston futzal milliy terma jamoasining yakuniy tarkibini e’lon qildi. Vakillarimiz turnirning "B" guruhidan joy olgan. Mazkur kvartetda hamyurtlarimizga Avstraliya, Iroq va Saudiya Arabistoni termalari raqiblik qiladi. Dastlabki o‘yinimiz 17-aprel kuni Avstraliya terma jamoasiga qarshi kechadi, bellashuv soat 14:00 da start olishi rejalashtirilgan. Tailandda bo‘lib o‘tadigan chempionatda quyidagi futzalchilar harakat qiladi.

Nasib qilsa, yangi tarix yaratamiz

Futzal bo‘yicha O‘zbekiston terma jamoasi so'nggi o‘rtoqlik uchrashuvida Qozog‘iston bilan kuch sinashdi. Tushunarli bo'lishi uchun, Qozog‘iston Yevropa vakili bo‘lib, jahon reytingida 7-o‘rinda ketmoqda. Birinchi o‘yinda durang qayd etgan vakillarimiz ikkinchi bahsda raqibdan ustun kelishdi. Terma jamoamizning 6 ta golidan 3 tasiga Ixtiyor Ropiyev mualliflik qildi. Futzalchi o'yindan so'ng mahalliy manbalardan biriga intervyu berdi. "Bundan oldin ham Qozog‘iston terma jamoasiga qarshi o‘ynaganimiz uchun tasavvur bor edi. Ular Jahonda reytingda yetakchilar qatorida. Kuchli terma jamoa hisoblanardi. Biz ham ulardan kam bo‘lmagan holda borimizni berib o‘ynadik. Bu bellashuv Osiyo Kubogiga tayyor holda borishimizga zamin yaratadi. Ulardan ustun tomonimiz shunda bo‘ldiki, bizda g‘alabaga bo‘lgan ishonch va ishtiyoq kuchli edi. Yangi murabbiyga boshida moslashish qiyin bo‘ldi. O‘rtoqlik uchrashuvlari va mashg‘ulotlarda turli taktik sxemalariga moslashdik. Biz har safar Osiyo chempionatidan medallar bilan qaytganmiz. Bu safargi musobaqada nasib qilsa, yangi tarix yaratamiz", - deydi Ixtiyor Ropiyev.