ФАХРИЙ ЭНЕРГЕТИКЛАРГА ЭҲТИРОМ КЎРСАТИЛДИ

“Иссиқлик электр станциялари” АЖда “1 октябрь – Ўқитувчи ва мураббийлар куни” умумхалқ байрами муносабати билан маънавий-маърифий тадбир ташкил этилди.

Очиқ ва самимий суҳбат тарзида ташкил этилган тадбирда энергетика соҳасида узоқ йиллар машаққатли фаолият юритган, бугун пенсияда бўлган 20 га яқин меҳнат фахрийлари иштирок этишди.

Тадбирда сўзга чиққанлар, тараққиётнинг тамал тоши ҳам, мамлакатни қудратли, миллатни буюк қиладиган куч ҳам бу – таълим ва тарбия эканини, бунда устозларнинг ўгитлари ва тарбияси муҳим эканини таъкидлашди. 

- Жамият ҳаётида устозлар билимисиз ривожланиши мумкин бўлган соҳанинг ўзи йўқ. Глобаллашув замонида инсонларнинг энергетикага бўлган талаби тобора кучайиб борар экан, соҳада устозлар ва мураббийларнинг билими ва тажрибаси беқиёс аҳамиятга эга. Зеро, мамлакатимиз аҳолиси ва иқтисодиёт тармоқларини электр ва иссиқлик энергияси билан мунтазам таъминлашда камарбаста бўлаётган ёшларнинг ютуғида уларнинг ҳиссаси катта, - дейди “Иссиқлик электр станциялари” АЖ бошқаруви раиси Фарҳод Абдураҳмонов.

Тадбирда сўз олган нуроний устозлар бугун юртимиз мамлакатимиз раҳбари бошчилигида амалга оширилаётган ислоҳотларни, жумладан, электр энергетика соҳасида кузатилаётган янгиланишларни ғурур ва ифтихор билан тилга олишди.

Тадбир сўнгида устоз ва мураббийларга эсдалик совғалари топширилди.