Maktablarda yangi fan – “San'at”

Prezident Shavkat Mirziyoyev maktab taʼlimini rivojlantirish va sifatini oshirishga oid rejalar taqdimoti bilan tanishdi.

Ixtisoslashgan maktabda muhandislik dasturi

Mirzo Ulugʻbek nomidagi ixtisoslashtirilgan maktabda Myunxen texnika universiteti bilan hamkorlikda, tajriba tariqasida, muhandislik dasturlarini joriy qilish taklif etilmoqda. Bu dastur “Yangi Oʻzbekiston” universiteti dasturi bilan integratsiya qilinadi.

14 ta maktabda darslar ingliz tilida 

Prezident taʼlim muassasalari agentligi huzurida jamoatchilik asosida “Fan kengashlari” tuziladi. Bu kengashlar taʼlim dasturlarini ishlab chiqish, baholash tizimini takomillashtirish, oʻqituvchilarning kasbiy mahoratini oshirishga jalb qilinadi.

Kelgusi oʻquv yilidan 14 ta maktabda fanlarni ingliz tilida oʻqitishni yoʻlga qoʻyish, 2025-2026 yillarda 8 ta yangi ixtisoslashgan maktab quriladi.

Maktabni bitirish imtihonlarida fan tanlovi

Maktabni bitirish imtihonlarida oliy taʼlim muassasasiga kirish sinovlariga mos fanni tanlash imkoniyati yaratiladi.

Ijod maktablarida “Tasviriy sanʼat va chizmachilik” fani oʻrniga “Sanʼat” fani kiritish taklif etilmoqda. Bunda faqat rasm chizish emas, balki rangtasvir, hunarmandchilik, kinematografiya, haykaltaroshlik va dizaynga oid koʻnikmalar oʻrgatiladi.

Shuningdek, yirik korxonalar va klasterlar qoshida ansambllar tuzilib, mahallalarda konsertlar, maktablarda madaniyat kunlari tashkil etilishi belgilandi.