O'zbekistonda “Chiqindisiz dunyo uchun!” ekoaksiyasi oʻtkaziladi

Bugun ekologik muammolar haqida gap ketar ekan, chiqindi masalasi eng asosiy o'rinlarga chiqadi. Negaki, belgilanmagan joyga chiqindi tashlash, chiqindini qayta ishlash, chiqindi poligonlari masalalari bugun nihoyatda dolzarb ahamiyat kasb etib, atrof-muhitga salbiy ta'sir ko'rsatmoqda.

 “Chiqindisiz dunyo uchun!”

Aholining chiqindiga bo'lgan munosabatini o'zgartirish uchun esa targ'ibot ishlari, turli aksiyalar muhim ahamiyat kasb etadi. Shu boisdan Ekologiya, atrof-muhitni muhofaza qilish va iqlim oʻzgarishi vazirligi tomonidan “World Zero-Waste day” munosabati bilan Qoraqalpogʻiston Respublikasi, Toshkent shahri hamda viloyatlarda keng jamoatchilik bilan birgalikda “Chiqindisiz dunyo uchun!” ommaviy plogging ekoaksiyasi tashkil etiladi.

Tadbir qayerlarda bo'lib o'tadi?

Tadbir Oʻzbekiston boʻylab joriy yilning 30-mart (shanba) kuni soat 10:00da boshlanadi.

Ekoaksiya respublikamiz boʻylab hududlarning quyidagi manzillarida oʻtkaziladi:

• Toshkent viloyati — Toshkent dengizi sohili boʻyida;
• Toshkent shahri — Yakkasaroy tumani, Sharshara koʻchasida;
• Sirdaryo viloyati — Guliston shahri, “Yangi Hayot” MFY, Buyuk kelajak koʻchasida;
• Jizzax viloyati — Sharof Rashidov tumani, “Toqchilik” MFY va Uchtepa dahasini bogʻlovchi katta yoʻl yoqasida;
• Samarqand viloyati — Samarqand shahri, “Hishrav” qoʻrgʻonida;
• Navoiy viloyati — Navoiy shahri, “Kimyogar” MFY, Amir Temur koʻchasida;
• Buxoro viloyati — Buxoro shahri, “Somoniylar” istirohat bogʻining eski qalʼa devori bilan tutash hududida;
• Surxondaryo viloyati — Boysun tumanida;
• Xorazm viloyati — Urganch shahri, “Amir Temur” istirohat bogʻida;
• Qashqadaryo viloyati — viloyat markazidagi “Alisher Navoiy” nomidagi istirohat bogʻi hududida;
• Andijon viloyati — Andijon tumani, “Yangi Andijon” massivida;
• Namangan viloyati — To'raqo'rgon tumani, “Baxt” MFY hududidan oʻtuvchi avtomobil yoʻlida;
• Fargʻona viloyati — Fargʻona shahri, “Satkak” dam olish ziyoratgohida;
• Qoraqalpogʻiston Respublikasi — Nukus shahri, “Doʻstlik kanali” boʻyi dam olish maskanida.