Ofisda yoki uydan turib ishlash: Qaysi biri samaraliroq?

Pandemiya masofaviy ishlashni ko‘pchilik uchun reallikka aylantirdi va karantin tufayli butun dunyo ish uslublarini qayta ko‘rib chiqdi. Ba’zilar uchun bu o‘z vaqtlarini yaxshiroq boshqarish va ish va hayot o‘rtasidagi muvozanatni tiklash imkoniyatini berdi. Ammo boshqalar jamoaviy aloqaning yo‘qligi yoki samaradorlikning pasayishidan aziyat chekishdi. Bugungi kunda esa kompaniyalar yangi muvozanatni qidirmoqda: ofisda ishlash kerakmi, masofaviymi yoki gibrid model yaxshiroqmi? Quyida buni ko‘rib chiqamiz.

Onlayn ishlash: Ideal yechim yoki ish dunyosidagi yangi muammo?

McKinsey kompaniyasining tadqiqotlari shuni ko‘rsatadiki, masofaviy ish samaradorlikni oshirishga yordam beradi. Masalan, xodimlarning 83 foizi uydan turib ishlash ish samaradorligiga ijobiy ta’sir qilganini his qilishgan. Sabab esa aniq:

 • Yo‘lga vaqt sarflamaysiz. Xodimlar o‘rtacha bir necha soatni yo‘lda o‘tkazish o‘rniga, o‘sha vaqtni to‘liq ishga yoki dam olishga bag‘ishlaydilar.

 • Qulay ish muhiti. Uyda ishlash xodimlarga o‘z shaxsiy ehtiyojlariga mos keladigan muhitni yaratish imkonini beradi.

Ammo masofadan ishlashda ham muammolar yo‘q emas. Harvard Business Review tadqiqotlariga ko‘ra, uzoq muddatli masofaviy ish jamoaviylik hissini, hamkorlikni zaiflashtiradi. Ayniqsa, yangi xodimlarni jamoaga integratsiya qilishda muammolar yuzaga keladi. Ko‘plab kompaniyalar uchun ijodiy jarayonlar va g‘oyalar almashinuvi ofis muhitisiz zaiflashishi mumkin.

Ofisda ishlash: Kuch birlikda

Ofis muhiti ko‘p jihatdan jamoaviy ishlash uchun yaratilgan. Tadqiqotlarga ko’ra, ofisda ishlash:

 • Jamoaviy hamkorlikni mustahkamlaydi. Ofisda yuzma-yuz uchrashuvlar muammolarni tezroq hal qilish va ijodiy g‘oyalarni rivojlantirishga yordam beradi.

 • Mas’uliyatni oshiradi. Professional muhit xodimlarni o‘z ishiga yanada mas’uliyatli yondashishga undaydi.

Masalan, Amazon kompaniyasi xodimlarni yana ofisga qaytarishga qaror qildi. Kompaniya rahbariyati fikricha, bu xodimlarning “ixtirochilik qobiliyatini yaxshiroq ishga solish, birgalikda ishlash va bir-biri bilan yetarlicha aloqada bo‘lishi”ga xizmat qiladi. Ammo bu qaror xodimlar orasida turlicha fikrlarga sabab bo‘ldi, chunki ayrimlar masofadan ishlashda moslashuvchanlik hamda samaradorlik yuqoriroq deb hisoblaydilar.

Gibrid ish modeli ideal yechimmi?

Tadqiqotlar shuni ko‘rsatadiki, masofaviy ish va ofisda ishlashning afzalliklarini birlashtiruvchi gibrid model ko‘pchilik uchun ideal variant bo‘lishi mumkin.

Stanford universitetining tadqiqotlariga ko‘ra, haftada ikki kun uydan ishlash:

 • Samaradorlikni saqlashga yordam beradi.

 • Xodimlar orasida norozilikni kamaytiradi va ishdan ketish xavfini pasaytiradi.

Google kompaniyasi gibrid ish modelini joriy qilib, xodimlarga haftaning bir qismini ofisda, qolgan qismini esa uydan ishlash imkonini berdi. Bu yondashuv xodimlarning motivatsiyasini oshirib, kompaniya samaradorligini yuqori darajada ushlab turishga yordam berdi.

Masofaviy va ofisda ishlashning ijobiy va salbiy tomonlari

Masofaviy ish: Ijobiy tomonlari:

 • Xodimlar uchun yuqori moslashuvchanlik va yo‘lga vaqt sarflanmasligi.

 • Shaxsiy hayot va ish o‘rtasidagi muvozanat yaxshilanadi.

Salbiy tomonlari:

 • Jamoaviy aloqaning zaiflashishi va motivatsiyaning pasayishi.

 • Uy sharoitida chalg‘ituvchi omillar samaradorlikni kamaytirishi mumkin.

Ofisda ishlash: Ijobiy tomonlari:

 • Jamoaviy hamkorlikni kuchaytiradi va tezkor qarorlar qabul qilishga yordam beradi.

 • Yangi xodimlarni tezroq moslashishga imkon yaratadi.

Salbiy tomonlari:

 • Yo‘lga vaqt va xarajat sarflanishi.

 • Moslashuvchanlikning yo‘qligi sababli stressning ortishi.

Bu nega muhim?

Ish uslublari xodimlar motivatsiyasi, kompaniya samaradorligi va hattoki kadrlar oqimini belgilovchi asosiy omillardan biridir. Masalan, PwC tomonidan o‘tkazilgan so‘rov natijalariga ko‘ra, kompaniyalar rahbarlarining 55 foizi ofisda ishlash samaradorlikni oshirishini ta’kidlagan bo‘lsa, xodimlarning 70 foizi masofaviy yoki gibrid ish rejimiga afzallik berishini bildirgan. Bu esa kompaniyalar ish modelini qayta ko‘rib chiqishlari lozimligini ko‘rsatadi.

Nima qilish kerak?

Tadqiqotlar ko‘rsatishicha, ish uslubining samaradorligi kompaniyaning ehtiyojlariga, xodimlarning talablariga va ish turiga bog‘liq. Masofaviy ish texnologiyaga asoslangan va ijodiy ishlarda samaraliroq bo‘lsa, ofisda ishlash jamoaviy qaror qabul qilish va strategik loyihalarda ko‘proq muvaffaqiyat keltiradi. Gibrid model esa ko‘pchilik kompaniyalar uchun ideal yechim sifatida shakllanmoqda.

Zamonaviy dunyoda ish uslublarini diversifikatsiya qilish kompaniyalarga innovatsion yechimlar keltirish bilan birga xodimlarga o‘z imkoniyatlarini to‘liq ochib berishga yordam bermoqda. Natijada, har bir kompaniya va xodim o‘ziga mos keladigan balansni topishi lozim.