Bolani qutqarmoqchi bo‘lgan ona va ularning “qutqaruvchisi” cho‘kib ketdi

Chilonzor tumanidan oqib o‘tuvchi Bo‘rijar kanalida 3 kishi cho‘kib ketdi.

“Qutqaruv zanjiri”ning halokatli yakuni

Hodisa guvohlarining ko‘rsatma berishlaricha, 5 yoshli bola Bo‘rijar kanali atrofida o‘ynab yurgan vaqtida ehtiyotsizlik oqibatida kanalga tushib ketadi. Holatni ko‘rgan ona farzandini qutqarish uchun suvga tushadi. Ammo, oqimning tezligi hamda kanal chuqurligi tufayli bola bilan birga oqa boshlaydi.

Bundan tashqari, ona va bolani qutqarish uchun suvga tushgan yana bir shaxs ham cho‘kib ketgan. Holat 10-aprelda yuz bergani aytilmoqda.

Qidiruv ishlari davom etmoqda

Bugunga qadar ona va bolaning jasadi suvdan chiqarib olingan. Yana bir fuqaroning jasadini qidirish ishlari olib borilmoqda. Qidirilayotgan fuqaroning oila aʼzolari va yaqinlari haqida maʼlumot mavjud emas.