Bolafurush onalar: 15 kunlik goʻdakning “narxi” 40 ming dollarmi?

Ona deganda koʻz oldimizga farzandi uchun jonini ham ayamaydigan inson gavdalanadi. Har qanday vaziyatda ham farzandining yonini oladigan, shartsiz sevib, qoʻllab-quvvatlaydigan insonlar, shaksiz onalardir. Ammo sodir boʻlayotgan ayrim voqealar kishida ushbu ta'riflarga nisbatan shubha uygʻotmoqda.

Jumladan, kuni kecha Surxondaryo, Toshkent, Sirdaryo hamda Namangan viloyatlarida oʻz farzandlarini sotishga harakat qilgan ayollar qoʻlga olindi.

Farzandlarini 20 mingdan 40 ming dollargacha pullamoqchi boʻlgan “onalar”

Davlat xavfsizlik xizmati tomonidan hududlarda oʻtkazilgan tezkor tadbirlar davomida farzandlarini sotayotgan ayollar qoʻlga olindi. Sirdaryo viloyati Guliston shahrida vaqtincha yashovchi buxorolik ayol 15 kunlik oʻgʻlini 40 ming dollarga sotgan vaqtida ashyoviy dalillar bilan ushlangan.

Bundan tashqari, Surxondaryo viloyati Termiz tumanida yashovchi ayol 20 kunlik qizini oʻzining tanishi bilan til biriktirib, Termiz shahrida 25 mln. soʻmga sotgan vaqtlarida qoʻlga tushgan.

Toshkent viloyati Chirchiq shahrida yashovchi ayol oʻzining 6 yoshli oʻgʻlini Toshkent shahrida 3 ming dollarga sotgan vaqtida ashyoviy dalillar bilan ushlangan.

Shuningdek, Namangan shahrida yashovchi ayol oʻzining 10 yoshli oʻgʻil farzandini 18 ming dollarga sotishga kelishib, talab qilingan puldan 4 ming dollarini olgan vaqtida qoʻlga olingan.

Jazo muqarrar

Hozirda barcha holatlar yuzasidan mazkur shaxslarga nisbatan Jinoyat kodeksining 135-moddasi 3-qismi «a» bandi (Odam savdosi, oʻn sakkiz yoshga toʻlmaganligi aybdorga ayon boʻlgan shaxsga nisbatan sodir etilgan boʻlsa) bilan jinoyat ishlari qoʻzgʻatilib, tergov harakatlari olib borilmoqda. Bu kabi jinoyatni sodir etganlar uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanadi.

 Ilova: Saytning ichki qismidagi kirill yozuviga asoslangan rukn va ma’lumotlar tez kunda yangilanadi.