Qish mavsumi uchun 120 ming tonna benzin zaxirasi bo‘ladi

Mamlakatimizda kelgusi sovuq fasllarda iqtisodiyot tarmoqlari va ijtimoiy soha muassasalarini, shuningdek, aholi xonadonlarini energiya resurslari bilan uzluksiz ta’minlash masalasi davlat siyosatining diqqat markazida qolmoqda. Joriy yilning 6-iyul kuni prezident Shavkat Mirziyoyev neft-gaz tarmog‘ida navbatdagi kuz-qish mavsumiga ko‘rilayotgan tayyorgarlik ishlarining amaldagi holati yuzasidan hisobotlarni qabul qildi. Davlat rahbarining matbuot xizmati bergan ma’lumotlarga tayanadigan bo‘lsak, ushbu uchrashuvda tarmoq barqarorligini ta’minlashga qaratilgan keng ko‘lamli tahlillar va kelgusi rejalar muhokama qilingan.

77 ta gaz haydash agregati mukammal ta’mirlanadi

2026–2027-yillar kuz-qish mavsumida respublika miqyosida barqarorlikni ta’minlash maqsadida maxsus kompleks chora-tadbirlar rejasi ishlab chiqilgan. Hukumat oldiga iste’molchilarga tabiiy va suyultirilgan gazni tizimli yetkazish, magistral hamda hududiy tarmoqlarni sifatli ta’mirlash, zarur yoqilg‘i zaxiralarini yaratish hamda favqulodda vaziyatlarda tezkor harakat qiluvchi avariya-tiklash brigadalarining shayligini yuqori darajada ushlab turish bo‘yicha qat’iy talablar qo‘yildi.

Infratuzilmaviy loyihalar doirasida mavsum boshlangunga qadar magistral gaz quvurlarining nosoz va nuqsonli bo‘lgan 53,7 kilometrlik qismini butunlay yangilash belgilangan. Shu bilan birga, kompressor stansiyalarida samaradorlikni oshirish maqsadida 77 ta gaz haydash agregati mukammal ta’mirdan chiqariladi.

Gaz yetkazib berish tizimi uch bosqichlidan ikki bosqichliga o‘tkaziladi

Tizimda texnologik yo‘qotishlarni kamaytirish va aholi xonadonlariga bosimni barqaror yetkazish maqsadida muhim tarkibiy islohot amalga oshirilmoqda. Respublikadagi 881 ta mahallada istiqomat qiluvchi 220 ming xonadonning gaz ta’minotini yaxshilash maqsadida amaldagi uch bosqichli gaz taqsimlash tizimi optimallashtirilib, ikki bosqichli tizimga o‘tkazilishi rejalashtirilgan. Shuningdek, mavsumiy tayyorgarlik doirasida 711,9 kilometr uzunlikdagi gaz tarmog‘i hamda 400 ta gaz taqsimlash punkti to‘liq ta’mirlanadi va rekonstruksiya qilinadi.

120 ming tonna benzin zaxirasi

Uzoq va borish qiyin bo‘lgan hududlarni energiya bilan ta’minlash masalasiga ham alohida e’tibor qaratilgan. Kuz-qish mavsumi davomida mamlakat aholisiga umumiy hisobda 325,7 ming tonna suyultirilgan gaz yetkazib berilishi kafolatlanadi. Buning ichida, geografik joylashuvi jihatidan chekka hisoblangan 229 ta qishloqdagi 104,7 ming iste’molchining ehtiyojlari uchun 8,2 ming tonna suyultirilgan gaz alohida reja asosida yetkaziladi.

Yoqilg‘i-energetika xavfsizligini ta’minlash doirasida zaxiralarni jamg‘arish ishlari ham jadallashgan. Xususan, eng sovuq keladigan qish oylari – dekabr va yanvar uchun respublikada 120 ming tonna avtobenzin zaxirasini shakllantirish ko‘zda tutilgan. Issiqlik elektr stansiyalarining barqaror ishlashini kafolatlash maqsadida esa reja bo‘yicha mavsum davomida ularga 4,161 million tonna ko‘mir mahsuloti yetkazib berilishi prognoz qilinmoqda.

“O‘zbekneftgaz” aksiyadorlik jamiyati tizimidagi ishlab chiqarish quvvatlarini muhofaza qilish maqsadida 90 ta yirik texnologik qurilmada rejali ta’mirlash ishlari bajariladi. Ushbu chora-tadbirlar zavod va sanoat majmualarining uzluksiz ishlashini ta’minlashga va pirovardida ham iqtisodiyot tarmoqlariga, ham aholiga energiya resurslarini uzilishlarsiz yetkazib berishga zamin yaratadi.

Muvofiqlashtirish va qat’iy nazorat tizimi

Prezident topshirig‘iga binoan, tayyorgarlik jarayonlari faqat neft-gaz sohasi bilan cheklanib qolmasdan, balki umumiy energetika va kommunal xo‘jaligi tizimlari bilan hamohang, uzviy bog‘liqlikda olib borilishi shart. Shu maqsadhi respublika hamda hududiy komissiyalar faoliyati qayta ko‘rib chiqilib, ularga barcha ishlarni muvofiqlashtirish va kunlik nazoratni yo‘lga qo‘yish vazifasi yuklatildi.

Soha mutasaddilariga belgilangan barcha chora-tadbirlar ijrosini qat’iy tartibda tekshirish, barcha ta’mirlash va sozlash ishlarini belgilangan muddatlarda hamda yuqori sifat bilan yakunlash bo‘yicha topshiriqlar berildi. Asosiy maqsad — aholi xonadonlari hamda ijtimoiy soha ob’ektlariga tabiiy gaz, suyultirilgan gaz va boshqa hayotiy zarur yoqilg‘i resurslarini har qanday ob-havo sharoitida ham barqaror va uzluksiz yetkazib berishdan iboratdir.