Ўзбекистон Қаҳрамони, собиқ сенатор Ғайратдин Хожаниёзов вафот этди

Ўзбекистон Республикаси Фанлар академияси Қорақалпоғистон бўлими археология бўлими мудири, Ўзбекистон Қаҳрамони, тарих фанлари номзоди, профессор Ғайратдин Хожаниёзов вафот этди. Бу ҳақида Академия матбуот хизмати хабар берди.

Ғайратдин Хожаниязов 1948 йили Қораўзак туманида туғилган. 1972 йили Ўзбекистон Фанлар академияси Қорақалпоғистон филиалининг Н.Давқораев номидаги Тарих, тил ва адабиёт институтининг археология бўлимига ишга кирган. Кейинчалик Москва давлат университетида, Москвадаги Фанлар академиясининг Археология институтида тажрибасини орттирган.

1994 йилдан бошлаб ЎзР ФА Қорақалпоғистон бўлими тассаруфида янги очилган Тарих, археология ва этнография институтининг археология бўлимига дастлаб илмий ходим, сўнгра бўлим бошлиғи лавозимларида ишлаган. Ҳозиргача ЎзР ФА Қорақалпоғистон бўлими гуманитар фанлар илмий-тадқиқот институтининг археология бўлимининг мудири лавозимида фаолият юритиб келаётган эди.

Археолог Қорақалпоғистондаги кўплаб тарихий ҳудудлардаги археологик ёдгорликларида илмий-тадқиқот ишларини олиб борган ва экспедитсияларга раҳбарлик қилган.

Марҳум 2003 йилда “Меҳнат шуҳрати” ордени, 2008 йили “Ўзбекистон Қаҳрамони” унвонига сазовор бўлган, 2014 йилда Қорақалпоғистон Республикаси Жўқорғи Кенгашига депутат, 2015 йилда эса Ўзбекистон Республикасининг Сенат аъзоси этиб сайланган.

Uz24 таҳририяти Ғайратдин Хожаниёзовнинг вафоти муносабати билан марҳумнинг оила аъзолари ва яқинларига ҳамдардлик билдиради.