Samarqand rasman YUNESKO Bosh konferensiyasining 43-sessiyasiga mezbonlik qiladi

YUNESKOning Parijdagi bosh qarorgohida O‘zbekiston Respublikasi Hukumati va YUNESKO o‘rtasidagi kelishuv imzolanishiga bag‘ishlangan tantanali marosim bo‘lib o‘tdi. Bu haqda Saida Mirziyoyeva o‘zining Telegram sahifasida ma’lum qildi.

So‘nggi 40 yil ichida konferensiya birinchi marta Parijdan tashqarida o‘tkaziladi

Mirziyoyevaning so‘zlariga ko‘ra, so‘nggi 40 yil davomida ushbu konferensiya Parijdan boshqa yerda o‘tkazilmagan. 

“Bu ijodiy industriyaning mashaqqatli mehnati, xalq diplomatiyasi va eng yuqori darajadagi kelishuvlar samarasidir. Bu – jahon hamjamiyatining mamlakatimiz ochiqligi, oʻziga xos an’analari va madaniy merosi, boy tarixi, musiqasi, adabiyotiga katta qiziqishi bilan qarayotganidan dalolat.

Biz madaniyat va san’at vositasida mamlakatimizni xalqaro maydonda targ‘ib etmoqdamiz, dunyo ahliga yanada yaqinlashtirmoqdamiz. Bu aloqalar bevosita iqtisodiy natijalarga ulanib, qo‘shma loyihalar va umumiy g‘oyalarga aylanmoqda.

Xush kelibsan, YUNESKO! Samarqandda uchrashguncha!”, – deb yozadi prezident maslahatchisi.