Xizmat ko‘rsatish sohasi uchun 1 foizlik ijtimoiy soliq stavkasining amal qilish muddati uzaytirildi

2025-yil 27-fevral kuni O‘zbekiston Respublikasi Prezidenti “Xizmatlar sohasini barqaror rivojlantirish uchun qulay sharoitlar yaratishga oid qo‘shimcha chora-tadbirlar to‘g‘risida”gi qarorni (PQ-78-son) imzoladi. Ushbu qaror mamlakatda xizmatlar sohasini yanada rivojlantirish, yangi ish o‘rinlari yaratish va iqtisodiy o‘sishni ta’minlashga qaratilgan. Quyida qarorning asosiy yo‘nalishlari va maqsadli ko‘rsatkichlari bilan tanishamiz.

Xizmatlar sohasining asosiy maqsadlari

Prezident qaroriga muvofiq, 2025-yilda xizmatlar sohasini rivojlantirish bo‘yicha muhim maqsadlar belgilandi. Jumladan, xizmatlar hajmini 15 foizga oshirish, 3 million kishini daromadli ish bilan ta’minlash va 52,2 mingta yangi xizmat ko‘rsatish obyektlarini tashkil etish rejalashtirilgan. Bunga qo‘shimcha ravishda, 2022-yil 27-yanvardagi PQ-104-sonli qarorga binoan, xizmat ko‘rsatish sohasida faoliyat yurituvchi tadbirkorlar uchun 1 foizlik ijtimoiy soliq stavkasining amal qilish muddati 2028-yil 1-yanvargacha uzaytirildi. Bu esa tadbirkorlarni qo‘llab-quvvatlash va sohani yanada rivojlantirishga xizmat qiladi.

Xizmatlar sohasiga kredit mablag‘lari ajratiladi

2025-yilda xizmatlar sohasini moliyaviy qo‘llab-quvvatlash doirasida yirik mablag‘lar ajratilishi rejalashtirilgan. Jumladan, sohani rivojlantirish uchun 67,4 trillion so‘m yo‘naltiriladi. Shuningdek, yangi xizmat ko‘rsatish obyektlarini tashkil etish maqsadida develloperlar orqali tadbirkorlarga noturar joylarni lizingga berish uchun 4,5 trillion so‘m ajratiladi.

Xizmat ko‘rsatish infratuzilmasi kengayadi

2025-yilda mamlakat bo‘ylab 652 ta muhim loyihani infratuzilma bilan ta’minlash uchun 1 trillion so‘m ajratilishi rejalashtirilgan. Ushbu mablag‘ turizm va dam olish infratuzilmasini rivojlantirishga yo‘naltiriladi. Xususan, 72 ta sohilda dam olish maskanlari, 62 ta zamonaviy istirohat bog‘lari barpo etiladi. Shuningdek, tunu kun faoliyat yuritadigan 154 ta turizm va gastronomik yo‘nalishdagi savdo hamda ko‘ngilochar ko‘chalar tashkil etiladi. Bundan tashqari, yo‘l bo‘yi va boshqa xizmat ko‘rsatish obyektlari soni 364 taga oshirilishi ko‘zda tutilgan. Ushbu loyihalar hududlarda xizmatlar sohasining jadal rivojlanishiga zamin yaratishi kutilmoqda.

O‘zini o‘zi band qilgan fuqarolar uchun yangi imkoniyatlar

Qarorga ko‘ra, yengil transport vositalarida yo‘lovchi tashish faoliyati o‘zini o‘zi band qilgan fuqarolar shug‘ullanishi mumkin bo‘lgan xizmatlar ro‘yxatiga kiritildi. Ular ushbu faoliyat bilan maxsus litsenziya varaqasi asosida shug‘ullanishi mumkin bo‘ladi.

Shuningdek, 2025-yil 1-iyuldan quyidagi davlat xizmatlari va funksiyalari xususiy sektorga oʻtkaziladi.

Soliq tizimidagi o‘zgarishlar

2025-yil 1-apreldan boshlab soliq organlari tomonidan tadbirkorlarni nazorat qilish tizimi yangicha tartibda amalga oshiriladi. Agar huquqbuzarlik birinchi marta aniqlansa, tadbirkorga faqat ogohlantirish beriladi. Biroq uch kun ichida kamchiliklar bartaraf etilmasa yoki huquqbuzarlik takroran qayd etilsa, sayyor soliq tekshiruvi o‘tkazilishi belgilangan. Tekshiruv natijalari “Yagona davlat nazorati” axborot tizimida qayd etilib, biznes-ombudsmanga ma’lum qilinadi. Yakunda esa rasmiy dalolatnoma tuzilib, tegishli qaror qabul qilinadi.