2025-yilda 6,9 million gektar yer maydonlari xatlovdan o‘tkaziladi

AOKAda o‘tkazilgan brifingda Kadastr agentligi axborot xizmati rahbari Ne’mat Atamuratov 2025-yilda amalga oshiriladigan dolzarb vazifalar haqida ma’lumot berdi. Shundan kelib chiqib, 6,9 million gektar yer maydonlarini xatlovdan o‘tkazish rejasi belgilandi.

Yer xatlovlaridan maqsad nima?

Xatlov ishlari O‘zbekiston hududidagi yer resurslarini aniq hisoblash va ulardan foydalanish samaradorligini oshirishga qaratilgan. Ushbu jarayon orqali yerning huquqiy maqomini belgilash, noqonuniy egallangan maydonlarni aniqlash va yer resurslarini optimal boshqarish rejalashtirilmoqda.

Xatlov qaysi hududlarda amalga oshiriladi?

Xususan, xatlov ishlari 28 tumanni qamrab oladi. Unda umumiy hisobda 6,9 million gektar yer maydonlarini o‘rganish rejalashtirilgan. Bu orqali yerning hisobdagi va amaldagi maydonlari o‘rtasidagi farqlar aniqlanadi.

2024-yilda ham ushbu yo‘nalishda keng ko‘lamli ishlar amalga oshirildi. Jumladan:

  9 462,3 gektar noqonuniy egallangan yer aniqlangan.

  41 mingdan ortiq holatda noqonuniy qurilmalar ixtiyoriy ravishda bartaraf etildi.

  4 654,1 gektar yer bo‘yicha sudlarga da’vo arizalari kiritilib, 1 144,5 gektar yer qaytarilishi ta’minlandi.

Yer nazorati uchun zamonaviy texnologiyalar

Xatlov jarayonida zamonaviy texnologiyalar va “E-yer nazorat” axborot tizimidan foydalaniladi. Bu tizim yordamida 136 mingdan ortiq huquqbuzarlik holatlari aniqlanib, ular tizimga kiritildi. Shuningdek, geodeziya va kartografiya sohasida ham faoliyat kengaytirilmoqda:

        125 ming kv.km hududda aero va kosmik suratga olish ishlari rejalashtirilgan.

        105 ming kv.km raqamli ortofotoplanlar yaratiladi.

        85 ming kv.km maydonda topografik xaritalar yangilanadi.

2025-yil uchun boshqa dolzarb vazifalar

Yer xatlovidan tashqari, 2025-yilda quyidagi yo‘nalishlarda ish olib boriladi:

11,4 mingta ko‘chmas mulk obyektining davlat ro‘yxatidan o‘tkazilishi;

 53,3 mingta yer uchastkasini “Yerelektron” axborot tizimiga kiritish;

 1 000 nafar mutaxassis va kadastr muhandislarining malakasini oshirish;

 Fazo ma’lumotlari bo‘yicha uchta xalqaro standartni O‘zbekiston milliy standarti sifatida qabul qilish.