Toshkent metrosida hojatxona quriladigan bekatlar ro‘yxati e’lon qilindi

Avval Toshkent metropolitenining 9 ta bekatida ona va bola xonalari hamda hojatxonalar qurilishi rejalashtirilgani haqida xabar berilgandi. Ayni paytda bekatlar ro‘yxati rasman e’lon qilinib, to‘rtta bekatda qurilish ishlari boshlangan bo‘lib, loyiha hujjatlari yakunlanish bosqichida.

Qaysi bekatlarda qurilmoqda?

Metroning “Buyuk ipak yo‘li”, “Amir Temur xiyoboni”, “Paxtakor” va “Beruniy” bekatlarida qurilishning birinchi bosqichi boshlandi. Ushbu bekatlarda qurilayotgan hojatxonalar haqida bannerlar o‘rnatilgan.

Loyiha doirasida “Mustaqillik maydoni”, “Olmazor”, “Chorsu”, “Do‘stlik” va “Bodomzor” bekatlarida ham hojatxonalar qurilishi rejalashtirilgan.

Metroda hojatxona qurishga turtki bo‘lgan hodisa

Eslatib o‘tamiz, 2022-yil fevral oyida Toshkent metropolitenining “Chilonzor” bekatida sinov tariqasida ona va bola xonasi hamda hojatxona faoliyat boshlagan edi. Noyabr oyida esa metro bekatlaridan birida nomaqbul holat aks etgan video tarqalib, metroda hojatxonalar sonini oshirish borasida keng muhokamalar yuzaga kelgan edi.