«Ўзбекконцерт» давлат муассасасига янги директор тайинланди

«Ўзбекконцерт» давлат муассасасига янги директор тайинланди. Бу ҳақда муассаса ахборот хизмати хабар қилди.

Маълум қилинишича, «Ўзбекконцерт» давлат муассасаси директори вазифасини вақтинча бажарувчи этиб Анваржон Тожибоев тайинланди. Директор вазифасини вақтинча бажариб келган Алишер Жамолиддинов директорнинг ижодий масалалар бўйича ўринбосари сифатида ўз иш фаолиятини давом эттиради.

Ушбу тайинлов ҳақида маданият вазири Озодбек Назарбековнинг 4 ноябрь куни «Ўзбекконцерт» ходимлари билан бўлиб ўтган онлайн-йиғилишида эълон қилинган.

А.Тожибоев тайинловгача Маданият вазирлиги концерт-томоша фаолиятини ривожлантириш бошқармаси бошлиғи вазифасида ишлаб келган. Шунингдек, у фаолияти давомида «Ёшлар» телерадиоканали «Маънавият» бош муҳарририяти муҳаррири, «Ўзбекнаво» эстрада бирлашмаси Бош директор ёрдамчиси, «Ўзбекнаво» эстрада бирлашмаси Концерт-томоша фаолиятини ташкил этиш бошқармаси бошлиғи ўринбосари ва Маданият ва спорт ишлари вазирлигида турли лавозимларда фаолият олиб борган.

Эслатиб ўтамиз, июнь ойида «Ўзбекконцерт» ни 2017 йил октябридан бери бошқариб келаётган Одилжон Абдуқаҳҳоров ўз лавозимини тарк этганди.