ЎзПФЛ Ўзбекистон кубоги ҳақида маълумот берди

Ўзбекистон Профессионал футбол лигаси хабар беришича, Ўзбекистон кубоги мусобақаси учрашувлари гуруҳ босқичи тизимида эмас, балки олимпия тизимида ўтказилиши режалаштирилган. ПФЛ бу борада клублар билан ўзаро фикр алмашган. Унга кўра, бирйўла 12 клуб — «Қўқон-1912», «Машъал», «Пахтакор», «Сурхон», «Бухоро», «Насаф», «Металлург», «Сўғдиёна», «Шўртан», «Андижон», «Бунёдкор» ҳамда АГМК форматни олимпия кўринишига ўзгартириш таклифини илгари сурди. Мазкур клублар орасидан фақатгина АГМК кубок учрашувларини марказлаштирилган ҳолда Тошкент шаҳри ва вилоятларида ўтказиш таклифини берди. Яна тўрт клуб — «Қизилқум», «Локомотив», «Навбаҳор» ҳамда «Оқтепа» форматни гуруҳ босқичи кўринишида қолдириш истагини билдирди.

Ҳолат юзасидан ЎзПФЛ Ўзбекистон футбол ассоциацияси билан фикр алмашди ҳамда уч баробар кўпроқ овоз тўплаган вариант пандемия даврида мақбул вариант деб топилди. Шундан келиб чиқиб, кубок учрашувларига олимпия кўринишида қайта қуръа ташлаш маросими ўтказиш тўғри йўл бўлади.

ЎзПФЛ бу борада Спорт-ТВ канали билан фикр алмашади. Ишчи режага кўра, қуръа маросими Ўзбекистон миллий терма жамоасининг ФИФА кунларидан ўрин олган биринчи учрашуви танаффусида ёки ўйингача бўлиб ўтиши катта эҳтимол. ЎзПФЛ бу борада алоҳида маълумот беради.

Маълумот учун, Суперлига учрашувларига қуръа ташлаш маросимида Ўзбекистон кубогининг финал учрашувига Наманган шаҳри мезбонлик қилишига ойдинлик киритилган. Наманган шаҳридаги финалга қадар жамоалар ҳар бир босқичда биттадан учрашувда иштирок этади. Қуръа саватидан биринчи бўлиб олинган жамоа мезбон, иккинчиси эса меҳмон мақомида бўлади. 90 дақиқа давомида ғолибни аниқлаб бўлмаса, 15 дақиқадан иккита қўшимча тайм, кейин эса пенальтилар церийасига навбат берилади.

Алмаштириш мумкин бўлган футболчилар сони борасида алоҳида маълумот тақдим этилади. Айни ҳолатда ЎзПФЛ 90 дақиқа ичида уч уринишда тўрт футболчи алмаштириш ва ўйин қўшимча таймларга қадар чўзилса, яна бир нафардан футболчини алмаштириш таклифини илгари сурмоқда. Бу борада ЎзПФЛ клублар бош мураббийлари билан фикр алмашади.

Спорт оламидаги қайноқ ҳабарлар бу ерда.