Toshkentda Turkiy davlatlar xalqaro universiteti tashkil etiladi

25-yanvar kuni “Turkiy davlatlar xalqaro universitetini tashkil etish to‘g‘risida”gi Prezident qarori qabul qilindi. Qarorga ko‘ra, Toshkent shahrida Turkiy davlatlar xalqaro universiteti tashkil etiladi.

 Asosiy yo‘nalishlar

Muhandislik, qurilish, logistika, axborot texnologiyalari va dasturlash, sog‘liqni saqlash, qishloq xo‘jaligi, oziq-ovqat sanoati hamda iqtisodiy va ijtimoiy soha uchun xalqaro standartlarga muvofiq oliy ma’lumotli kadrlar tayyorlash;

O‘quv dasturlarini xorijiy, shu jumladan, Turkiyaning yetakchi oliy ta’lim tashkilotlari bilan hamkorlikda, shuningdek, qo‘shma ta’lim dasturlari asosida joriy etish hamda ilmiy-tadqiqotlar olib borish.

Nodavlat oliy ta’lim muassasasi

Universitet nodavlat oliy ta’lim tashkiloti hisoblanadi hamda o‘z faoliyatini O‘zbekistonning ta’lim sohasidagi qonunchilik hujjatlari asosida amalga oshiradi.

2025/2026 o‘quv yilidan Universitetda ta’lim jarayoni ta’lim sohasida xalqaro e’tirof etilgan tashkilotlar reytingida birinchi 1000 talik ro‘yxatga kirgan, shuningdek, o‘z yo‘nalishida yetakchi hisoblangan Turkiya Respublikasi oliy ta’lim tashkilotlarining o‘quv dasturlari asosida tashkil etiladi.

To‘lov-kontrakt miqdori universitet tomonidan belgilanadi

Universitetda talabalarni o‘qitish to‘lov-kontrakt asosida amalga oshiriladi hamda qabul parametrlari va to‘lov-kontrakt miqdori Universitet tomonidan belgilanadi.

Universitet faoliyatini yo‘lga qo‘yish va muvofiqlashtirish bo‘yicha boshqaruv kengashi tashkil etiladi.

Oliy ta’lim nima maqsadda tashkil qilinadi?

Turkiy davlatlar va xalqlar o‘rtasidagi madaniy, ilmiy va ijtimoiy aloqalarni mustahkamlash, umumiy tarix, til, adabiyot va qadriyatlarni rivojlantirishga hissa qo‘shish.

Turkiy davlatlar o‘rtasida ilmiy tadqiqotlar va ta’lim sohasidagi hamkorlikni kuchaytirish, zamonaviy ilm-fan yutuqlaridan birgalikda foydalanish.

Turkiy davlatlar yoshlari uchun yuqori sifatli ta’lim berish, ularning intellektual va professional salohiyatini oshirish, o‘z mamlakatlari uchun yetakchilarni yetishtirish.

Turkiy xalqlar umumiy madaniyatini, tarixiy merosini va urf-odatlarini o‘rganish va kelajak avlodlarga yetkazish.

Universitetning maqsadi nafaqat an’anaviy ta’lim berish, balki innovatsion texnologiyalarni qo‘llab-quvvatlash va mintaqadagi iqtisodiy taraqqiyotni ta’minlashga xizmat qiluvchi ilmiy ishlanmalarni yaratishdir.

Ushbu universitet turkiy davlatlar ittifoqining ta’lim sohasidagi ramzi sifatida ham ko‘riladi va u davlatlar o‘rtasidagi do‘stona aloqalarni yanada mustahkamlashga xizmat qiladi.

Bu universitet turkiy davlatlar uchun umumiy ta’lim va tadqiqot platformasini yaratib, xalqaro miqyosda turkiy xalqlarning o‘rnini kuchaytirishni maqsad qiladi.

Turkiy davlatlar universiteti avval ham qo‘shni respublikada ochilgan

Eslatib o‘tamiz, Turkiy davlatlar xalqaro universiteti ilk bora 1992-yilda Qozog‘istonning Chimkent (hozirgi nomi Turkiston) shahrida Qozog‘iston va Turkiya hukumatlari o‘rtasida imzolangan kelishuvga binoan Xo‘ja Ahmad Yassaviy nomidagi xalqaro qo‘shma universitet sifatida tashkil etilgan. Ushbu universitet turkiy davlatlar o‘rtasidagi hamkorlikni kuchaytirish, umumiy ilmiy va madaniy qadriyatlarni rivojlantirish maqsadida tashkil qilingan birinchi muhim loyihalardan biri hisoblanadi.