Sud ekspertlari uchun maxsus avtotransport joriy etilmoqda

Sud ekspertlariga foydalanish uchun maxsus navbatchi avtomobillari beriladi. Ushbu maxsus avtotransport vositasi ekspertiza tadqiqotlarini o‘tkazish uchun mo‘ljallangan zamonaviy uskunalar bilan jihozlangan. Bu haqda Adliya vazirligi axborot xizmati xabar bermoqda.

Avtotransport sud ekspertlariga qulaylik bo’lishi uchun tashkil qilingan

Ma’lum qilinishicha, X. Sulaymonova nomidagi Respublika sud ekspertiza markazida faoliyat yurituvchi sud ekspertlariga voqea sodir boʻlgan joyga chiqib obyektlarni tezkorlik bilan koʻzdan kechirish, ish uchun ahamiyatli ashyoviy dalillarni qidirish, aniqlash, olish va tadqiqotlarni olib borish taʼminlash maqsadida maxsus navbatchi avtotransport vositasidan foydalanish yoʻlga qoʻyildi.

Maxsus mashinadan turli ekspertiza joylariga chiqishda ham foydalaniladi

Shuningdek, mazkur avtotransport vositasidan asosan sud-avtotexnika ekspertizasi, yongʻin texnik ekspertizasi, sud qurilish texnikaviy ekspertizasi, sud-trasologik ekspertizasi hamda odam DNKsi sud-biologik ekspertizasi boʻyicha voqea joyiga chiqishda foydalaniladi.

Endilikda ushbu maxsus avtotransport vositasi ekspertiza tadqiqotlarini oʻtkazish uchun moʻljallangan zamonaviy uskunalar bilan jihozlangan boʻlib, ekspertlarga voqea joyida turli xil obyektlarni oʻrganish bilan birgalikda xulosalarni rasmiylashtirishga ham imkon yaratiladi.