Жаҳонгир Ортиқхўжаев Тошкент форумида ёшларга мурожаат қилади

Жорий йилнинг 18-21 декабрь кунлари ҳукумат вакиллари ва ёшлар ўртасида очиқ мулоқот ўрнатишга имкон бериши кутилаётган “Тошкент ёшлар форуми – 2020” бўлиб ўтади. Бу ҳақида форум дирекцияси аъзолари хабар бермоқда.

Қайд этилишича, Тошкент шаҳар ҳокимлиги томонидан Ёшлар ишлари агентлиги, Ўзбекистон ёшлар иттифоқи ҳамкорлигида ташкил этилаётган форумда доирасида пойтахт туманларида амалга оширилган, 2021 йилда барча туманларга татбиқ этилиши кўзда тутилган “Шунқорлар” ҳарбий-спорт мусобақалари, “Мунозара”, “Квиз” интеллектуал ўйинлари, болалар ижодиёти фестивали, “Ёшлар театр фестиваллари”, “Ёш китобхон оила”, “1+1” тадбиркорлик лойиҳаси, “Янги Тошкент қиёфаси” танлови, “Ёшлар ва медиа” танлови, “Талабалар фестивали” каби кўплаб лойиҳалар тақдимоти ўтказилиши режалаштирилган. Шунингдек, Форум кунларида ёш кино ижодкорларининг “Ёшлар ва гендер тенглиги” мавзусидаги тақдимотлари, махсус эффектлардан фойдаланиш бўйича мутахассислар иштирокидаги мастер-класс, “Дебют” – қисқа метражли фильмлар намойишини ўтказиш белгиланган. Тадбирнинг якуний босқичида эса пойтахт ёшларининг бутун мамлакат ёшларига мурожаати ўқиб эшиттирилади.

Форумнинг асосий мақсади таълим, соғлиқни сақлаш, маданият, спорт, туризм, иқтисодиёт, банк, суд-ҳуқуқ каби кўплаб соҳаларда ёш иқтидорли кадрларни излаб топиш, уларни қўллаб-қувватлаш ва кенг жамоатчиликка танитиш, ёшларни янги марраларга илҳомлантириш, ал малакасини ошириш, ҳукумат вакиллари ва турли соҳа раҳбарлари билан очиқ мулоқотларга киришиб, уларга ўз таклиф ва ташаббусини намойиш этишига йўл очиб беришдан иборат эканлиги айтилмоқда.

Форум якунида Тошкент шаҳар ҳокими Жаҳонгир Ортиқхўжаев “2021 йилда Тошкент шаҳрида ёшлар учун инфратузилмалар” мавзусидаги тақдимоти билан чиқиш қилиши кутиляпти.

Шунингдек, 21 декабрь куни форум доирасидаги тадбирларда фаол иштирок этган ёшлар тақдирланиб, Humo Arena муз саройида бўлиб ўтадиган гала-концерт бўлиб ўтади.

«Тошкент ёшлар форуми – 2020»да қатнашмоқчи бўлган ёшлар tashkent2020.uz сайтида рўйхатдан ўтишлари зарур.