TikTok qanday qilib foydalanuvchilarni 35 daqiqa ichida o‘ziga qaram qilib qo‘yadi?

Yaqinda oshkor bo‘lgan ichki hujjatlar TikTok ilovasining algoritmi qanday ishlashini va uning foydalanuvchilarga tezda bog‘lanish hissini shakllantirish imkonini berishini ko‘rsatdi. Ushbu hujjatlarga ko‘ra, foydalanuvchilar atigi 35 daqiqa davomida ilovadan foydalangandan keyin unga kuchli bog‘lanib qolishi mumkin. Bu vaqt ichida ular o‘rtacha 260 ta qisqa video tomosha qilishadi, va bu algoritm foydalanuvchilarning diqqatini doimiy ravishda TikTok’da ushlab turishga xizmat qiladi.

Yoshlar uchun xavfli

TikTok’ning tez odatlantiruvchi xususiyati, ayniqsa yosh foydalanuvchilar uchun xavfli. Tadqiqotlar TikTok’da uzoq vaqt o‘tkazishning turli ruhiy salomatlik muammolariga olib kelishini ko‘rsatadi. Uzoq vaqt davomida ilovadan foydalanish xavotirning oshishi, xotiraning susayishi, hamdardlik va muloqot ko‘nikmalarining pasayishiga olib kelishi mumkin. Yoshlar orasida TikTok’ning katta ommalashuvi bu muammolarni yanada jiddiylashtiradi.

TikTok’ning ruhiy salomatlikka ta’siri

TikTok o‘z algoritmi orqali foydalanuvchilarga individual qiziqishlariga mos keladigan kontentni ko‘rsatadi. Bu algoritm “For You” sahifasini shakllantiradi, ushbu sahifa foydalanuvchilarning e’tiborini maksimal darajada ushlab qolish uchun maxsus ishlab chiqilgan. Algoritm foydalanuvchilarning har bir xatti-harakatini, shu jumladan qancha vaqt video ko‘rilishini, qanday kontent bilan ko‘proq o‘zaro aloqada bo‘lishini kuzatadi va shunga mos kontentlarni taklif qiladi. Ushbu tizim foydalanuvchilarni ilovadan uzilishsiz foydalanishga undaydi va bu o‘z navbatida, ularning salomatligiga ta’sir o‘tkazadi.

TikTok rahbariyati bunga nima deydi?

TikTok rahbariyati mazkur ichki hujjatlar oshkor qilingandan so‘ng bu borada o‘z fikrini bildirgan. Ularning so‘zlariga ko‘ra, foydalanuvchilar uchun ekran vaqti cheklovlari mavjud va bu vositalar, asosan, yosh foydalanuvchilarning salomatligini himoya qilish uchun joriy qilingan. Biroq, ko‘plab tanqidchilar TikTok’ning bunday choralarni ommaviy qabulni yaxshilash uchun qo‘llayotgani, haqiqiy xavfsizlikka qaratilgan emasligi haqida fikr bildirishmoqda.

AQShda TikTok’ka qarshi da’volar

Bu ma’lumotlar oshkor bo‘lgach, AQShda bir necha shtatlarda TikTok’ga qarshi huquqiy da’volar kiritildi. Da’volarda TikTok yosh foydalanuvchilarni ilovaga qasddan bog‘lab qo‘yish maqsadida harakat qilganlikda ayblanmoqda. Huquqiy shikoyatlarda, TikTok foydalanuvchilarni uzoq vaqt davomida ilovada qolishga majbur qiluvchi tizimlar yaratgani va bu orqali ularning ruhiy salomatligi hisobiga foydalanuvchi faolligini birinchi o‘ringa qo‘yayotgani aytilmoqda.

TikTok’ka qaramlik giyohvandlikka qaramlik bilan bir xil

Psixologlar TikTok algoritmining ta’sirini ba’zi jihatlari bilan giyohvandlikka qiyoslaydi. Ilovada yangi kontentni muntazam ravishda kuzatish imkoniyati va har bir yangi video foydalanuvchiga “yangilik hissi” berishi, miyada dofamin ajralishiga sabab bo‘ladi. Bu esa o‘z navbatida, foydalanuvchilarda ilovaga nisbatan kuchli bog‘lanish va odat hosil qiladi. Yosh foydalanuvchilar orasida ushbu mexanizm ruhiy bosimlarni oshiradi, real hayotdagi ijtimoiy muloqot va amaliy ko‘nikmalar rivojiga to‘sqinlik qiladi.