Ўзбекистонда Испания элчихонаси очилиши мумкин

Польшанинг Лодз шаҳрида Ўзбекистон ташқи ишлар вазири Владимир Норов Испания Қироллигидаги ҳамкасби билан учрашди. Томонлар иқтисодий алоқалар, туризм, маданий-гуманитар ва таълим соҳаларида ҳамкорлик бўйича фикр алмашди. Ўзбекистон расмий Мадриднинг Тошкентда элчихона очиш режаларини олқишлади.

1 декабрь куни Полшанинг Лодз шаҳрида Ўзбекистон ташқи ишлар вазири Владимир Норов ва Испания Қироллиги ташқи ишлар, Европа Иттифоқи ва ҳамкорлик вазири Хосе Мануэл Албарес Буэно ўртасида музокаралар бўлиб ўтди, дея хабар бермоқда вазирлик матбуот хизмати.

Мулоқотда икки мамлакат ташқи ишлар вазирликлари раҳбарлари Ўзбекистон — Испания кўп қиррали ҳамкорлигининг бугунги ҳолати ва уни ривожлантириш истиқболларини муҳокама қилди.

«Ўзбекистон Испанияни Европадаги ишончли ва истиқболли ҳамкор деб билади ва расмий Мадриднинг яқин келажакда Тошкентда элчихона очиш режаларини олқишлайди», — дейилади хабарда.

Томонлар март ойида бўлиб ўтган Ўзбекистон — Испания сиёсий маслаҳатлашувларининг еттинчи раундининг самарали натижаларини қайд этиб, ушбу шаклдаги мулоқотни давом эттиришга тайёр эканликларини билдирди.

Ташқи иқтисодий алоқалар кўрсаткичларини ошириш, икки мамлакат ишбилармон доиралари ўртасида тўғридан-тўғри алоқаларни фаоллаштириш, қўшма истиқболли лойиҳаларни амалга ошириш, мамлакат бозори имкониятларини ўрганиш мақсадида Испаниянинг етакчи компанияларининг Ўзбекистонга ташрифини ташкил этиш юзасидан аниқ таклифлар кўриб чиқилди.

Вазирлар туризм, маданий-гуманитар ва таълим соҳаларида ҳамкорликни мустаҳкамлаш бўйича ҳам фикр алмашди.