Rossiya Markaziy Osiyo davlatlari orqali G‘arb mamlakatlaridan qurol olmoqda

Tadqiqotlarga ko‘ra, Rossiyaga nisbatan 2014-yildan beri joriy qilingan qurol embargosiga qaramay, rus snayperlari G‘arb davlatlaridan minglab miltiq va millionlab o‘q-dorilarni olishda davom etmoqda. Qurollar Rossiyaga qo‘shni davlatlar orqali keladi, deb yozmoqda The Insider.

Qurol yetkazib berish hajmi oshirilgan

Unga ko‘ra, Tekshiruv mualliflari Yevropa Ittifoqi, AQSh va Turkiya kompaniyalari so‘nggi yillarda Armaniston, Gruziya, Qozog‘iston, Qirg‘iziston va O‘zbekistonga qurol yetkazib berishni bir necha bor oshirganini aniqladi. Xususan UN Comtrade ma’lumotlariga ko‘ra, 2020-yildan 2023-yilgacha Armaniston, Gruziya, Qozog‘iston va Qirg‘izistonga eksport ikki yarim baravar ko‘paygan: 19,5 mingtadan 53,2 mingtagacha.

Eksport hajmi raqamlarda

Shu bilan birga, Italiyadan Armanistonga miltiq va o‘q-dorilar eksporti to‘rt yil ichida qariyb 30 baravarga oshgan – 2019-yildagi 68 dona quroldan 2023-yilda 1,8 mingtagacha. 2020 va 2021-yillarda Italiyadan qurol xarid qilmagan Qirg‘iziston 2022-yilda 882 dona, 2023-yilda esa 4 ming 434 dona qurol olgan. Turkiyadan Gruziyaga qurol eksporti 2019-yilda 8,4 ming donadan 2023-yilda 18, 8 ming donaga oshgan.

AQSh qurollari Qozog‘iston orqali Rossiyaga kirib bormoqda

Rossiyaga berilishi mumkin bo‘lgan snayper miltiqlari va ov miltiqlarining boshqa yetkazib beruvchilari orasida AQShning Kolorado shtatidagi ABF qurol do‘koni ham bor. The Insider keltirgan bojxona ma’lumotlariga ko‘ra, 2022-2023-yillarda kompaniya Qozog‘istonga Accuracy International, Cadex Defence, FN Herstal, Patriot Ordnance Factory va Proof Research kompaniyalaridan 53 ta vintovka yetkazib bergan. Ushbu qurollarning Qozog‘istonda sotilishi haqida ma’lumot yo‘q, lekin eslatib o‘tilgan brendlardan kamida ikkitasini ilgari ABF bilan hamkorlik qilgan Rossiya kompaniyasidan topish mumkin.