Тошкент вилоятида қудуққа тушган икки эркак бир ўлимдан қолди

Тошкент вилояти Тошкент тумани Бунёдкор маҳалласида яшовчи фуқаро ўз хонадонининг дарвозаси яқинида қурилган, чуқурлиги 6 метрдан ортиқ бўлган қудуққа ичидаги ёғочларни олиб чиқиш мақсадида тушиб, бир ўлимдан қолди. Бу ҳақда ФВВ Матбуот хизмати хабар берди.

Маълум бўлишича, қудуқ тубида кислород етарли бўлмагани сабабли унинг соғлиғи кутилмаганда ёмонлашиб қолади. Унга ёрдам бериш учун тушган бошқа бир фуқаронинг ҳам аҳволи ёмонлашади. 

Шу вақт хонадон эгасининг ўғли қудуқ ичидан ёрдам сўраб келаётган овозни эшитиб қолади ва қутқарув хизматига қўнғироқ қилади.

Зудлик билан воқеа жойига етиб келган қутқарувчилар қудуқ ичида ҳушини йўқотаёзган икки нафар фуқарони юқорига олиб чиқишади. Уларга зарур ёрдамларни кўрсатиб, ҳаётини сақлаб қолишади.