Qishloq xo‘jaligi vazirligi: Qoramollarda hech qanday yuqumli kasallik tarqalmagan

Bir necha kun avval ijtimoiy tarmoqlarda noma’lum shaxs tomonidan tarqatilgan, qoramollarda yuqumli kasalliklar mavjudligi haqidagi xabarlar Qishloq xo‘jaligi vazirligi tomonidan rad etildi.

So‘nggi 6 oyda qoramollarda kasallik aniqlanmagan

Veterinariya va chorvachilikni rivojlantirish qo‘mitasi tomonidan o‘tkazilgan o‘rganishlar natijasida, so‘nggi olti oy davomida respublikada chorva mollarida hech qanday kasallik aniqlanmaganligi tasdiqlandi. Chorvachilik sohasi doimiy kuzatuv ostida bo‘lib, zamonaviy yondashuvlar yordamida qoramollarni sog‘lom saqlash, kasalliklardan himoya qilish bo‘yicha yangi usullar joriy etilmoqda, deyiladi vazirlik xabarida.

Yolg‘on ma’lumot tarqatgan fuqaro

Shuningdek, noma’lum shaxs tomonidan tarqatilgan audioxabar Farg‘ona viloyati, Buvayda tumani “Buyuk ipak yo‘li” MFYda yashovchi fuqaro Feruza Tursunova tomonidan tarqatilgani aniqlandi. Fuqaro Tursunovaga yolg‘on va asossiz ma’lumotlar tarqatish oqibatlari tushuntirilib, ogohlantirildi.

Vazirlik so‘nggi paytlarda ijtimoiy tarmoqlarda bunday asossiz xabarlar ko‘payib borayotganiga e’tibor qaratib, fuqarolarga faqat rasmiy manbalar orqali tarqatilgan ma’lumotlarga tayanishlarini so‘radi. Shuningdek, Qishloq xo‘jaligi vazirligi tizimida chorvachilikni nazorat qilish, kasalliklarning oldini olish bo‘yicha jiddiy choralar ko‘rilayotganini ta’kidladi.