Gashishga psixotrop moddalarini ayirboshlamoqchi bo‘lganlar qo‘lga tushdi

Samarqandlik fuqaro Namanganda yarim kilodan ko‘proq narkotik bilan qo‘lga tushdi.

Avtomashinaga yashirilgan giyohvand moddalar

29-aprel kuni soat 21:00 larda Samarqand viloyatida istiqomat qiluvchi 1999-yilda tug‘ilgan fuqaro Namangan shahri hududida yurgan paytida IIB xodimlari tomonidan shubha ostiga olinadi va uning avtomashinasi to‘xtatilib, xolislar ishtirokida tekshirib ko‘riladi.

Tekshiruvlar davomida qora paketga solingan, ichidan oq paket bilan o‘ralgan to‘q jigarrang o‘tkir hidli modda borligi aniqlanib, tekshiruv uchun yuboriladi. Natijada, bu modda 691 gramm gashish ekanligi aniqlangan.

Narkotikni olib kelishdan maqsad esa yanada yomonroq

Ushbu shaxs tergov qilinganida narkotik moddalarni Samarqand shahridagi tanishidan olib, Namanganlik fuqaroga regapen psixotrop tabletkalariga alishtirmoqchi bo‘lganligini tan olgan.

Qonuniy jazo

Ushbu holat yuzasidan Namangan shahar IIB huzuridagi tergov bo‘limi tomonidan Jinoyat kodeksining 273-moddasi 5-qismi bilan jinoyat ishi qo‘zg‘atilgan va ayblanuvchiga nisbatan qamoqqa olish ehtiyot chorasi qo‘llangan. Hozirda dastlabki tergov harakatlari olib borilmoqda.