Президентлик сайловида қатнашадиган дастлабки номзод маълум қилинди

Ўзбекистон президентлик сайловларида илк марта иштирок этаётган Ўзбекистон Экологик партияси ўз номзодини илгари сурди. Бу ҳақда партия марказий кенгашининг навбатдан ташқари пленумида маълум қилинди.

Президент сайловида Экопартия томонидан партия марказий кенгаши ижроия қўмитаси раиси Нарзулла Обломуродов номзод сифатида қатнашади. Навбатдан ташқари пленумда Нарзулла Обломуродов ҳам сўзга чиқди.

Пленумда Экопартия сайловда ўз электорати манфаатларидан келиб чиққан ҳолда муносиб иштирок этиши таъкидланди. Шунингдек, Экопартиянинг сайловолди платформасидаги асосий йўналишлар маълум қилинди:

– экологик хавфсизликни таъминлашга қаратилган давлат сиёсатини амалга ошириш;

– атроф муҳитни муҳофаза қилиш, табиий ресурслардан оқилона фойдаланиш ва аҳоли учун қулай яшаш шароитлари яратиш;

– иқлим ўзгаришларига мослашиш, Орол фожиаси оқибатларини юмшатиш ва Оролбўйи ҳудудини янада ривожлантириш;

– давлат ва жамият бошқаруви, суд-ҳуқуқ тизимида ислоҳотлар самарадорлигини ошириш;

– соғлиқни сақлаш, таълим, илм-фан ва маданий-маърифий соҳаларни янада ривожлантириш;

– ташқи сиёсат ва халқаро ҳамкорликни ривожлантириш.

Маълумот учун, Экопартия 2021 йилги Ўзбекистон президенти сайловида биринчи бўлиб ўз номзодини кўсатди. Сайлов 24 октябр куни ўтказилади. Унда фақат сиёсий партиялар ўз номзодини кўрсата олади.