2024-yil 19-mayning eng muhim voqealari dayjesti

63-gullar festivali

Bugun, 19-may kuni Namangan shahrida 63-Xalqaro gullar festivali boshlandi. 30 milliondan ortiq gul ekilgan Zahiriddin Muhammad Bobur nomidagi madaniyat va istirohat bog‘ida bayram tantanalari bo‘lib o‘tmoqda.

Rossiyadan oltin medallar

Rossiyaning Xabarovsk shahrida boks bo‘yicha “Konstantin Korotkov xotira turniri” o‘z yakuniga yetdi. 

Hal qiluvchi kun 16 nafar hamyurtimiz oltin medal uchun jang qilishdi. Quvonarlisi, yakunda O‘zbekiston terma jamoasi 7 ta oltin va 9 ta kumush medalini jamg‘arib, umumjamoa hisobida birinchi o‘rinni egalladi. G‘olib va sovrindorlar ro‘yxati:

 Oltin medal:

-54 kg: Aziza Yoqubova

-54 kg: Hasanboy Do‘smatov

-57 kg: Abdumalik Xalokov

-67 kg: Ruslan Abdullayev

-71 kg: Asadxo‘ja Mo‘ydinxo‘jayev

-86 kg: Jasurbek Yo‘ldoshev

+92 kg: Bahodir Jalolov

 Kumush medal:

-50 kg: Robiyaxon Baxtiyorova

-66 kg: Dilfuza Bekova

-75 kg: Aziza Dayirbekova

-48 kg: Avazjon Yo‘ldoshev

-54 kg: Shahzod Muzaffarov

-60 kg: Dilshod Abdumurodov

-80 kg: To‘rabek Habibullayev

-92 kg: Madiyar Saidrahimov

+92 kg: Lazizbek Mullojonov

Malayziya vaziri qoyil qoldirgan gilamlar

Malayziya Bosh vaziri Anvar Ibrohim Buxoroga tashrifi chog‘ida Buxoro gilamchilik markazida bo‘ldi.

Martabali mehmon bu yerda ipakdan to‘qilayotgan turli hajmdagi gilamlarning to‘qilish jarayonini kuzatdi va gilamdo‘zlarning qo‘l mehnati bilan yaralayotgan mehnat mahsulidan hayratda ekanini bildirdi. 

Investitsion hamkorlikka erishikdi

Toshkent viloyati hokimi Zoyir Mirzayev boshchiligidagi delegatsiya Rossiya Federatsiyasida bo‘lib turibdi.

Delegatsiya vakillarini Ufa shahrida Boshqirdiston rahbari Radiy Xabirov tantanali kutib oldi. Shundan so‘ng Boshqirdiston Respublikasi hamda Toshkent va Farg‘ona viloyatlari o‘rtasida strategik sheriklik masalalari bo‘yicha uchrashuvlar bo‘lib o‘tdi.

Zoyir Mirzayev Toshkent viloyatining investitsion salohiyati xususida nutq so‘zladi.

Muzokaralar davomida turizm, sanoat va yog‘ochni qayta ishlash, qishloq xo‘jaligi sohalarida ikki tomonlama hamkorlik masalalari muhokama qilindi.

Boshqirdiston Respublikasi va Toshkent viloyati Savdo-sanoat palatalari rahbarlari V2V va G2B formatda tadbirkorlar bilan muloqotlar uyushtirdi. O‘zaro hamkorlik to‘g‘risida memorandum imzolandi.