2024-yil 13-mayning eng muhim voqealari dayjesti

Axborot agentliklari o'rtasida memorandum

O‘zA Argentina Respublikasi bilan har tomonlama hamkorlikni rivojlantirish maqsadida Lotin Amerika axborot agentligi (Latin America News Agency) bilan Anglashuv memorandumini imzoladi.

LANA (Latin America News Agency) butun dunyoga xabar uzatuvchi nufuzli axborot agentligidir. Qarorgohi Argentinaning Buenos-Ayres shahrida joylashgan muassasa Yevropa, Afrika va Osiyo bo‘ylab 20 ga yaqin hamkor bilan kelishuv imzolagan. Asosan ingliz va ispan tillarida ma’lumot tarqatuvchi ushbu nashrning xorijiy muxbirlari tarmog‘i mintaqada eng yirik hisoblanadi.

177,7 mln dollarlik eksport

Olmaliq kon-metallurgiya kombinati tomonidan ishlab chiqarilayotgan mahsulotlar eksporti borasida 2024 yil yanvar aprel holati bo‘yicha prognoz 105%ga bajarildi. O‘tgan 4 oy mobaynida 177 786 000 dollarga mahsulotlar eksporti amalga oshirildi.

15 653 tonna mis mahsulotlari, 9 372 tonna rux mahsulotlari, 242 tonna molibden mahsulotlari xorijlik iste’mochilarga yetkazib berilgan.

"Samarqand — Toshkent" yo‘nalishida qo‘shimcha “Afrosiyob”

“O‘zbekiston temir yo‘llari” AJ matbuot xizmatining xabar berishicha, yo‘lovchilarga qulaylik yaratish maqsadida joriy yilning 17, 18, 19 may kunlari 775/776-sonli “Samarqand — Toshkent — Samarqand” yo‘nalishida “Afrosiyob” elektropoyezdining qo‘shimcha harakati yo‘lga qo‘yiladi.

Poyezd quyidagi jadval asosida harakatlanadi:  

– 775-sonli “Samarqand — Toshkent” yo‘nalishi, Samarqand 11:11 — Toshkent 13:26,  

– 776-sonli “Toshkent — Samarqand” yo‘nalishi, Toshkent 13:51 — Samarqand 16:05da harakatlanadi.  

Londonda “Global Uzbekistan Festival” haftaligi

7-10-may kunlari O‘zbekiston elchixonasi tashabbusi bilan Britaniyaning Vestminster universiteti bilan hamkorlikda London shahrida “Global Uzbekistan Festival” haftaligi doirasida madaniy-ma’rifiy va sport tadbirlari tashkil etildi.

Har yili keng ko‘lamda o‘tkaziladigan mazkur anjumanda qatnashish uchun Toshkent shahridagi Xalqaro Vestminster universiteti (WIUT) rahbariyati boshchiligida professor-o‘qituvchilar, talabalaridan iborat 30 kishilik delegatsiya Londonga bordi.