2024-yil 24-dekabrning eng muhim voqealari dayjesti

Shavkat Mirziyoyev Ozarbayjon prezidenti Ilhom Aliyev bilan telefon orqali muloqot qildi

O‘zbekiston va Ozarbayjon Prezidentlari ikki tomonlama hamkorlikni kengaytirish bo‘yicha rejalarni muhokama qildilar. Bu haqda Prezident matbuot xizmati xabar bermoqda. Davlatimiz rahbari Ozarbayjon yetakchisining mamlakat mustaqilligini mustahkamlash, hududiy yaxlitligini tiklash, barqaror taraqqiyotini ta’minlash va xalqaro nufuzini yuksaltirishdagi tarixiy rolini alohida ta’kidladi.

Prezidentlar oliy darajadagi kelishuvlarni amalga oshirish doirasida O‘zbekiston-Ozarbayjon do‘stlik va ittifoqchilik munosabatlarini yanada kengaytirish va mustahkamlashning dolzarb masalalarini ko‘rib chiqdilar.

O‘zbekiston va Ozarbayjon rahbarlari xalqaro kun tartibi yuzasidan ham fikr almashdilar, bo‘lajak tadbirlar rejasini ko‘rib chiqdilar.

O‘zbek shoirasi AQSHning nufuzli adabiy mukofotini qo‘lga kiritdi

Dallasdagi Texas universitetida joylashgan Mundus Artium Press nashriyoti 2024-2025-yil uchun o‘zining nufuzli adabiy mukofoti g‘oliblarini e’lon qildi.

Adabiyot va san’atga qo‘shgan ulkan hissasi uchun ta’sis etilgan bu mukofot adabiyotning insoniyat qalbi va ruhini yuksaltirish hamda ijobiy tomonga o‘zgartirishdagi mustahkam kuch-qudrat ekanini alohida e’tirof etadi. 2024-2025-yilgi adabiyot bo‘yicha Mundus Artium Press mukofotiga o‘zbekistonlik taniqli shoira Xosiyat Rustamova sazovor bo‘ldi. Ushbu oliy mukofot Xosiyat Rustamovaning adabiy san’atda erishgan yutuqlarini o‘zida ifodalaydi va so‘z san’atining insoniyat tamaddunidagi eng buyuk tasavvurga aylantira oladigan yuksak maqomini ham e’tirof etadi.  

Nashriyot saytida qayd etilishicha, shoiraning ijodi Mundus Artium Pressga xos bo‘lgan butun dunyo adabiyot, san’at ahlini birlashtirishga qaratilgani bilan e’tiborli. Darhaqiqat, Xosiyat Rustamova she’riyatida beg‘ubor tuyg‘ular, insonning kechinmalari juda betakror va o‘ziga xos tarzda, dildan va samimiy ifoda etilgani bilan adabiyot muxlislari mehrini qozongan.  

Shavkat Mirziyoyev Rossiyaga tashrif buyuradi

O‘zbekiston prezidenti Shavkat Mirziyoyev Rossiya prezidenti Vladimir Putinning taklifiga binoan 25-26 dekabr kunlari bo‘lib o‘tadigan MDH va YeOII sammitlarida ishtirok etish uchun amaliy tashrif bilan Sankt-Peterburg shahrida bo‘ladi. Mamlakat yetakchisi Mustaqil Davlatlar Hamdo‘stligi davlat rahbarlarining norasmiy uchrashuvi va Oliy Yevrosiyo iqtisodiy kengashining navbatdagi yig‘ilishida kuzatuvchi maqomida ishtirok etadi.

Sammitlar kun tartibidan mazkur ko‘p tomonlama birlashmalar doirasidagi o‘zaro manfaatli hamkorlikni yanada kengaytirishning dolzarb masalalari o‘rin olgan. Birgalikda qilingan ishlarning asosiy yakunlari sarhisob qilinadi va kelgusi yilgi amaliy hamkorlikning ustuvor yo‘nalishlari yuzasidan fikr almashiladi.

Bo‘stonliqda tog‘da adashib qolgan 5 kishi qutqarildi

FVV qutqaruvchilari tog‘da fuqarolarga amaliy yordam ko‘rsatdi. Bu haqda vazirlik ma’lum qildi. Kecha, 23 dekabr kuni soat 12:24 da Toshkent viloyati FVB Bo‘stonliq tumani Ixtisoslashgan ko‘p tarmoqli boshqarmasiga Qoramozor mahallasi Chaxcham qishlog‘i hududidagi Suron ota tog‘iga besh nafar fuqaro sayr qilish maqsadida borib, yo‘ldan adashib qolganligi haqida xabar kelib tushgan. Xabarga asosan, Chimyon yong‘in-qutqaruv otryadidan bir guruh qutqaruvchilar zudlik bilan aytilgan manzilga yetib borgan va olib borilgan qidiruv-qutqaruv ishlari natijasida fuqarolar sog‘-salomat xavfsiz hududga olib tushilgan. FVV xabarida aytilishicha, tan jarohati olganlar yo‘q.