2024-yil 19-noyabrning eng muhim voqealari dayjesti

O‘zbekiston va Qozog‘istonning Olmaota viloyati o‘rtasidagi savdo-iqtisodiy aloqalar jadallashadi

O‘zbekiston elchisi Baxtiyor Ibragimov Olmaota viloyati hokimi Marat Sultangaziyev bilan uchrashuv o‘tkazdi, deb xabar qilmoqda “Dunyo” axborot agentligi.

Muloqot chog‘ida qishloq xo‘jaligi, sanoat, turizm, savdo sohalaridagi hamkorlikni va madaniy-gumanitar aloqalarni faollashtirish masalalari muhokama qilindi.

Suhbatdosh mamlakatimiz hududlari bilan savdo-iqtisodiy hamkorlik izchil rivojlanib borayotganini va joriy yilning dastlabki sakkiz oyida Olmaota viloyatining O‘zbekiston bilan o‘zaro savdosi 171 million AQSh dollarni tashkil etganini ta’kidladi. Uchrashuv yakunida mavsumiy meva va sabzavotlarni o‘zaro yetkazib berish, sut mahsulotlari va qadoqlash materiallarini birgalikda ishlab chiqarishni tashkil etish, Olmaota viloyati delegatsiyasining Qashqadaryo viloyatida o‘tkaziladigan “Kashkadarya invest – 2024” biznes-forumida ishtirok etishni uyushtirish va boshqalar to‘g‘risida kelishib olindi.

Oliy Majlis Senati raisi va uning o‘rinbosarlari saylandi

Oliy Majlis Senatining parlament saylovidan keyingi birinchi majlisida Tanzila Norboyeva Senat raisi etib saylandi.  

Tanzila Norboyeva davlat va jamoat boshqaruvida boy tajribaga ega ekani, o‘tgan davrda shu lavozimdagi samarali faoliyati natijasida mamlakatimizda xotin-qizlar, bolalar huquqlarini taʼminlash va ularning qonuniy manfaatlarini himoya qilish bo‘yicha vaziyat sezilarli ravishda yaxshilangani taʼkidlandi.  

Sodiq Safoyev Senat raisining birinchi o‘rinbosari lavozimiga tayinlandi. Amanbay Orinbayev Senat raisining o‘rinbosari lavozimiga saylandi. Senatorlar nomzodlarni bir ovozdan qo‘llab-quvvatladi.  

Prezident senatorlar tomonidan Senat raisi va uning o‘rinbosarlari etib saylangan Tanzila Norboyeva, Sodiq Safoyev, Amanbay Orinbayevni ularga bildirilgan yuksak ishonch bilan tabriklab, ularning kelgusi faoliyatida yutuq va muvaffaqiyatlar yor bo‘lishini tiladi.

Toshkent davlat agrar universitetiga rektor tayinlandi

O’zbekiston Respublikasi Vazirlar Mahkamasining tegishli qaroriga asosan Narzullo Naimovich Oblomuradov Toshkent davlat agrar universiteti rektori lavozimiga tayinlandi. N.Oblomuradov 1975-yil Samarqand viloyatida tug'ilgan. Ma'lumoti - oliy. 1996-yilda Jahon iqtisodiyoti va diplomatiya universitetini, 2000 yilda – Birmingem universitetini (Buyuk Britaniya) tamomlagan. Mutaxassisligi iqtisodchi, Iqtisodiyot fanlari doktori. Tayinlovga qadar N.Oblomuradov Toshkent davlat agrar universitetining O’quv ishlari bo’yicha prorektori lavozimida faoliyat yuritgan.

Nurafshonda 7 kilogrammlik pahlavon chaqaloq dunyoga keldi

Toshkent viloyati Nurafshon shahar Tug‘ruq kompleksida ncha muncha emas, naqd yetti kilolik chaqaloq dunyoga keldi. 

Onaning ham, bolaning ham ahvoli yaxshi. Xabar berilishicha, bunday holat Toshkent viloyatida birinchi bor kuzatilmoqda.

Avvalroq, Sirdaryoda ham vazni yetti kilolik qizaloq dunyoga kelgani haqida xabar berilgan edi.