2024-yil 11-noyabrning eng muhim voqealari dayjesti

Elektr energiyasi uchun chegirma berish haqidagi hujjat loyihasi ishlab chiqildi

O‘zbekistonda tabiiy gaz bilan ta’minlanmagan hududlarda aholiga elektr energiyasi uchun to‘lov qilishda yengillik yaratishga qaratilgan qaror loyihasi ishlab chiqildi.Qayd etilishicha, hujjat loyihasi ayni paytda tegishli tashkilotlarga yuborilgan. Bu yangilik haqida bundan bir oy oldin energetika vaziri Jo‘rabek Mirzamahmudov “Lolazor” podkastidagi chiqishida aytib o‘tgandi. U gazlashtirilmagan hovlilar uchun ham elektr energiya tariflariga 50 foizlik chegirma berish bo‘yicha topshiriq bo‘lganini ta’kidlagan.

O‘zbekiston tarixiy Jahon chempionatini 1-o‘rinda yakunladi

5–10-noyabr kunlari Toshkent shahrida o‘tkazilgan aralash jang san’ati turlari bo‘yicha birinchi Jahon chempionatining kattalar o‘rtasida o‘tkazilgan bellashuvlarida o‘zbekistonlik jangchilar jami 12 ta medalni qo‘lga kiritib, umumjamoa hisobida 1-o‘rinni egalladi. Yoshlar o‘rtasida final bellashuvlarida 8 nafar O‘zbekiston vakili chempionlik uchun jang qildi. E’tiborlisi, O‘zbekiston yoshlar jamoasi ham kattalar kabi umumjamoa hisobida 1-o‘rinni band etdi. Yoshlar jamoasi jami 18 ta medalga sazovor bo‘ldi.

O‘zbekistonga yaqin joydan 85 mln. yillik dinozavr qoldiqlari topildi

Tojikistonning So‘g‘d viloyati Kansay qishlog‘ida dinozavrlarning boy majmuasi, jumladan, terizinozavrlar qoldiqlari topildi. Bu haqda “Asia-Plus” xabar berdi. 20—28-oktyabr kunlari davom etgan qo‘shma ekspeditsiya tarkibiga Yekaterinburg, Sankt-Peterburg va Moskvadan rossiyalik paleontologlar kirgan. Ish ulkan kanyonda olib borilgan, uning lateral yuzasi, xususan, yuqori bo‘r konlari o‘rganilgan. Qazishmalar natijasida kaltakesak, salamandr, qurbaqa, baliq qoldiqlari topilgan. Olimlar bu davrda yashagan yirikroq hayvonlarning qoldiqlarini ham topgan. Timsoh va toshbaqa qobig‘ining qismlari, shuningdek, dinozavr suyaklarining bo‘laklari topilgan.

O‘zbekiston va Saudiya Arabistoni “yashil” energetika sohasidagi sheriklikni kengaytiradi

Shavkat Mirziyoyev 11-noyabr kuni Ar-Riyod shahrida o‘tkazilayotgan navbatdan tashqari arab-islom sammiti doirasida Saudiya Arabistoni energetika vaziri shahzoda Abdulaziz bin Salmon Ol Saudni qabul qildi, deb xabar bermoqda Prezident matbuot xizmati. Qayd etilishicha, qo‘shma investitsiya loyihalarini amalga oshirish va “yashil” energetika sohasida amaliy hamkorlikni yanada kengaytirish masalalari muhokama qilindi. O‘zbekistonda shamol va quyosh elektr stansiyalarini qurish, shuningdek, “yashil” vodorod ishlab chiqarish loyihalarini tezlashtirish masalalariga alohida e’tibor qaratildi.