Оскар мукофотига Ўзбекистондан тавсия қилинган фильм “Олтин Глобус” рўйхатига ҳам киритилди

Аввалроқ, 2020 йил 21 ноябрь куни Ўзбекистон Оскар қўмитасининг йиғилишида Ўзбекистон Оскар қўмитаси томонидан сайёрамизнинг нуфузли Оскар мукофотининг “Энг яхши халқаро бадиий фильм” номинациясига Ўзбекистон номидан Ёлқин Тўйчиевнинг “Фариданинг икки минг қўшиғи” фильми танланганди.

Ўзбекистон миллий кинокомиссияси томонидан мазкур фильм ҳар йили анъанавий тарзда ўтказилувчи «Олтин глобус»нинг навбатдаги 78-тақдимоти лонг-листига киритилди. Пандемия туфайли қолдирилган бу йилги «Олтин глобус» тақдимоти 2021 йилнин 28 февралига кўчирилди. Тақдимот Калифорния штати Беверли-Хиллз шаҳрида, Беверли-Ҳилтон меҳмонхонасида ўтказилиши кутилмоқда.

Маълумот учун, «Олтин глобус» Голливуднинг хорижий матбуот уюшмаси томонидан 1944 йилдан буён кинофилм ва телевизион картинларни тақдирлаб келади. «Олтин глобус» кино саноатида «Оскар»дан кейин турадиган машҳур ва анъанавий тақдимот ҳисобланади.