O‘zbekiston oltin xaridi bo‘yicha dunyo yetakchilari qatoriga kirdi

Markaziy banklar noyabr oyida global rasmiy oltin zaxiralarini jami 53 tonnaga oshirdilar. Ushbu o‘sishda O‘zbekiston ham faol qatnashib, 9 tonna oltin xarid qildi. Bu iyul oyidan beri birinchi oylik xarid bo‘ldi va mamlakatning umumiy oltin zaxirasi 382 tonnaga yetdi.

Markaziy banklarning noyabr oyidagi oltin xaridlari

Polsha Milliy banki noyabr oyida eng yirik xaridor bo‘lib, 21 tonna oltin sotib oldi. Hozirda oltin Polshaning umumiy zaxiralarining 18 foizini tashkil etadi.

O‘zbekiston Markaziy banki noyabr oyida 9 tonna oltin xarid qilib, yil boshidan buyon jami 11 tonna oltin xarid qildi. Bu mamlakatni yirik xaridorlar ro‘yxatida yuqori o‘ringa olib chiqdi.

Hindiston Rezerv banki noyabrda yana 8 tonna oltin sotib olib, umumiy xaridni 73 tonnaga yetkazdi. Xitoy Markaziy banki esa oltin sotib olishni qayta boshladi va 5 tonna oltin xarid qildi. Qozog‘iston Milliy banki ketma-ket ikkinchi oyda oltin zaxiralarini 5 tonnaga oshirdi.

AQSh saylovlaridan so‘ng oltin narxining pasayishi markaziy banklar uchun qulay imkoniyat yaratdi. Xususan, Chexiya, Turkiya va Iordaniya banklari ham oltin xaridlarini davom ettirdilar.

Eng katta sotuvchilar Singapur va Finlyandiya

Noyabr oyida Singapur Monetar boshqarmasi oltin zaxiralarini 5 tonnaga kamaytirdi. Finlyandiya banki esa dekabr oyida oltin zaxiralarini 10 foizga qisqartirib, 44 tonnaga tushirdi.

Markaziy banklarning oltin zaxiralariga bo‘lgan qiziqishi davom etmoqda

Markaziy banklar 2024-yilda ketma-ket 15 yil davomida oltinning yirik xaridorlari bo‘lishda davom etmoqda. Ushbu tendensiya global iqtisodiy noaniqlik sharoitida oltinning barqaror va xavfsiz aktiv sifatida dolzarbligini yana bir bor tasdiqladi.