“Qora dayjest”: 2024-yil 11-noyabr voqealari

Toshkentda “zakladchik”ni kaltaklagan uch nafar shaxs qo‘lga olindi

Toshkent shahrida fuqaroni olib qochib ketib, urib tan jarohati yetkazgan uch nafar shaxsga nisbatan jinoyat ishi qo‘zg‘atildi. Bu haqda poytaxt IIBB axborot xizmati xabar berdi.

Ijtimoiy tarmoqlarda bir fuqaro uch nafar shaxs tomonidan “samosud” qilingani aks etgan video tarqaldi. Huquq-tartibot organlari xodimlari tomonidan olib borilgan o‘rganishlar davomida ma’lum bo‘lishicha, videoda kaltaklangan yigit “zakladka” yo‘li orqali giyohvand moddalarni tarqatish bilan shug‘ullanib kelgan.

Biroq u Telegram kanal boshqaruvchisi bergan topshiriqni o‘z vaqtida bajarmasdan, chuv tushirishga uringan. Shundan so‘ng, buyurtmachi uni jazolash maqsadida odam yollagan. Uning rasmini, qachon va qayerga borish haqidagi ma’lumotlarni yetkazib bergan. “Zakladchik” aytilgan manzilga borganida, uni uch nafar noma’lum shaxs kutib olgan va Spark rusumli avtomashinaga o‘tqazib, olib ketgan.

Toshkentdan Saudiya Arabistoniga uchayotgan reys ortga qaytib keldi

Kecha, 10-noyabr kuni Toshkentdan Saudiya Arabistoniga uchayotgan reys uchish aeroportiga qaytib keldi. Bu haqda Uzbekistan Airways xabar berdi.

Qayd etilishicha, Toshkent – Jidda yo‘nalishi bo‘yicha HY335 reysi yo‘lovchilardan birining sog‘ligi yomonlashgani sababli jo‘nab ketgan aeroportga qaytishga majbur bo‘lgan. Samolyot tez orada o‘z manziliga qarab davom etishi ma’lum qilingan, biroq aniq vaqt aytilmagan.

Farg‘onada ayol dugonasini o‘ldirib, uyini yoqib yubordi

Sudlanuvchi ayolning kreditdan qarzlari bo‘lgan va u qarzlarni uzish niyatida tanishini tunamoqchi bo‘lgan.

Aniqlanishicha, marhuma ayolning turmush o‘rtog‘i bo‘lmagan. Oqibatda uning dugonasi unga turmush o‘rtoqlikka da’vogar shaxslarni topib, u bilan yaqin munosabatda bo‘lgan.

Marhuma ayol o‘limidan oldin sudlanuvchidan shubhalanib, qiziga unga eshikni ochmasligini ham tayinlagan. Biroq sudlanuvchi marhumaning uyiga qizi maktabda bo‘lgan vaqtda borgan.

Natijada marhuma bilan janjallashib, o‘zi olib borgan pichoq bilan unga 20 dan ortiq og‘ir tan jarohatlari yetkazgan. Uni o‘ldirgandan so‘ng, jinoyatini yashirish maqsadida uyini yoqib ketgan.

Internet orqali narkotik dorilarni reklama qilgan o‘smirlar qo‘lga olindi

Toshkent shahrining Yunusobod tumanida voyaga yetmaganlarning internet tarmoqlari orqali narkotik-dori do‘konlari reklamasini tarqatish bilan shug‘illanayotganlar faoliyatiga chek qo‘yildi. Bu haqda poytaxt IIBB matbuot xizmati xabar berdi.

Patrul xizmati xodimlari 6-noyabr kuni ertalab soat 04:00 atrofida ikki o‘smirni payqab qolishgan. Tekshiruv chog‘ida ularning qo’lidaqora bo‘yoq solingan purkagichli qutilari, telefonlarida dorixona do‘konlari reklamasi aks ettirilgan graffitilar tushirilgan joylarning fotosuratlari topilgan. Yoshlar har bir yozuv uchun Telegram messenjeri orqali 20 ming so‘mdan taklif qilinganini tan oldi.

Navoiyda Nexia va Exeed to‘qnashishi oqibatida ikki kishi halok bo‘ldi

Navoiyda inson o‘limi bilan bog‘liq YTH sodir bo‘ldi. Viloyat IIB xabariga ko'ra, YTH 9 noyabr kuni soat taxminan 16:00 larda xalqaro ahamiyatga ega bo‘lgan “Navoiy-Uchquduq” yo‘lida sodir bo‘lgan. 

Dastlabki xulosalarga ko‘ra, Nexia haydovchisi o‘zi bilan bir yo‘nalishda harakatlanib borayotgan transport vositasini quvib o‘tish jarayonida qarama-qarshi yo‘nalishda kelayotgan Exeed mashinasi bilan to‘qnashgan.

YTH oqibatida bir kishi voqea joyida, bir kishi shifoxonada vafot etgan.