Mirziyoyev xalqaro minbarda nimalar dedi?

Sankt-Peterburg shahrida o‘z ishini boshlagan 29-Peterburg xalqaro iqtisodiy forumining yalpi yig‘ilishi jahon hamjamiyatining diqqat markazida bo‘lib turibdi. Mazkur nufuzli yalpi majlisda joriy yilning 5-iyun kuni O‘zbekiston Respublikasi Prezidenti Shavkat Mirziyoyev ishtirok etdi va xalqaro minbardan turib mamlakatning strategik tashabbuslarini bayon qildi. Tadbirda Rossiya Federatsiyasi Prezidenti Vladimir Putin, Tanzaniya Prezidenti Samiya Suluhu Hasan hamda Xitoy Xalq Respublikasi Raisi o‘rinbosari Xan Chjen kabi yirik davlatlar vakillari ham asosiy spikerlar sifatida qatnashib, global iqtisodiyotning bugungi holati yuzasidan o‘z mulohazalarini o‘rtoqlashdilar.

O‘zbekiston rahbari o‘z nutqining muqaddimasida anjuman ishtirokchilarini qutlar ekan, mamlakatimizni Sankt-Peterburg shahri bilan uzoq yillik umumiy tarix, ma’naviy yaqinlik hamda ko‘plab insoniy taqdirlar bog‘lab turishini e’tirof etdi va ushbu muazzam shaharga qayta tashrif buyurish imkoniyati uchun minnatdorlik bildirdi.

Ochiqlikning sivilizatsiyaviy kodi

Prezident Shavkat Mirziyoyev o‘z chiqishida hozirgi kunda dunyo miqyosida kechayotgan chuqur transformatsiya jarayonlariga alohida to‘xtaldi. Bugungi kunda transport yo‘nalishlarining tubdan o‘zgarayotgani, mutlaqo yangi ishlab chiqarish zanjirlari qaror topayotgani, zamonaviy texnologik platformalar va sun’iy intellekt tizimlarining hayotimizga jadal kirib kelayotgani yangi geosiyosiy va iqtisodiy voqelikni shakllantirmoqda. Bugungi dunyoda raqobatning tabiati ham butunlay o‘zgargan.

“Raqobat nafaqat bozorlar va tabiiy resurslar uchun kurashda namoyon bo‘lmoqda, balki texnologiyalar, logistika va infratuzilma sohalarida ham uning ta’siri sezilmoqda”, — deya ta’kidladi O‘zbekiston rahbari.

Bunday murakkab sharoitda xalqaro maydonda birlashtiruvchi kuchga ega bo‘lgan, o‘z atrofiga hamkorlik, barqarorlik va o‘zaro manfaatdorlik muhitini to‘play oladigan davlatlar hamda mintaqalarning o‘rni har qachongidan ham yuqoridir. O‘zbekiston uzoq o‘tmishdan buyon mana shunday birlashtiruvchi ko‘prik vazifasini o‘tab kelmoqda.

“O‘zbekiston ming yillar davomida Buyuk ipak yo‘lining yuragi boʻlib kelgan. Samarqand, Buxoro va Toshkent orqali nafaqat mahsulotlar tashilgan, balki g‘oya va bilimlar, madaniy va diniy an’analar bir-birini o‘zaro boyitib kelgan. Shuning uchun ham ochiqlik biz uchun doimo tanlov emas, balki hayotiy zarurat va sivilizatsiya kodi hisoblangan”, — dedi mamlakat yetakchisi o‘z nutqida.

Yevroosiyo texnologik sanoatlashtirish kamari

Davlatimiz rahbari O‘zbekiston va Rossiya o‘rtasidagi strategik sheriklik hamda ittifoqchilik aloqalarining bugungi holatini tahlil qilar ekan, savdo-iqtisodiy, hududlararo aloqalar, sanoat kooperatsiyasi va energetika sohasidagi hamkorlik sifat jihatidan mutlaqo yangi, yuqori bosqichga ko‘tarilganini qayd etdi. Ushbu yo‘nalishdagi munosabatlarni yanada kengaytirish maqsadida O‘zbekiston tomoni yirik tashabbus bilan chiqdi. Bu — yagona raqamli platformaga tayanuvchi, o‘zaro integratsiyalashgan ishlab chiqarish klasterlari tizimini yaratishni ko‘zda tutuvchi “Yevroosiyo texnologik sanoatlashtirish kamari” loyihasidir.

Raqamlashtirish jarayonlari yangi ish o‘rinlari yaratish, logistika tizimlarini takomillashtirish, to‘lov xizmatlarini rivojlantirish hamda eksport imkoniyatlarini kengaytirishning asosiy omili sifatida e’tirof etildi. Shu nuqtayi nazardan, ikki mamlakat brendlarini hamkorlikdagi platformalarda ilgari surish, raqamli savdo hamda shahar servislarini tartibga solish qoidalarini bir-biriga yaqinlashtirish, shuningdek, sun’iy intellekt texnologiyalariga asoslangan mahsulotlarni rivojlantiruvchi qo‘shma Raqamli ekotizimni shakllantirish taklifi o‘rtaga tashlandi.

“Samarqanddan Peterburggacha”

O‘zbekiston aholisining demografik ko‘rsatkichlari, xususan, mamlakat dunyodagi eng yosh avlod vakillari qatlamiga ega ekani uning eng katta boyliklaridan biridir. Shuni inobatga olgan holda, zamonaviy ta’lim, kasb-hunarga o‘rgatish tizimi va mehnat bozori talablarini o‘zaro muvofiqlashtiruvchi Inson kapitalini rivojlantirish qo‘shma onlayn-platformasini yaratish zarurligi ta’kidlandi.

Madaniy-gumanitar sohadagi aloqalarni boyitish uchun esa yana bir strategik tashabbus — “Samarqanddan Peterburggacha” deb nomlangan kreativ-turistik yo‘lak loyihasini amalga oshirish taklif qilindi. Ushbu g‘oya nafaqat turizmni rivojlantirishni, balki san’at va kino festivallari, muzey koʻrgazmalari, gastronomiya haftaliklari va turli musiqiy tadbirlarni birgalikda tashkil etishni o‘z ichiga oladi.

O‘sish ko‘rsatkichlari va sanoat drayverlari

Ma’ruzada O‘zbekiston iqtisodiyotida so‘nggi yillarda amalga oshirilgan tub islohotlarning amaliy natijalariga ham to‘xtalib o‘tildi. Davlatimiz rahbari erishilgan yutuqlarni sarhisob qildi.

“Bundan o‘n yil oldin ochiqlik, inklyuzivlik va pragmatizmga tayangan holda Yangi O‘zbekistonni barpo etishni boshlagan edik. O‘tgan davrda uzoq muddatli o‘sish uchun mustahkam asos — qulay ishbilarmonlik muhiti, barqaror sanoat bazasi va yangi infratuzilma yaratildi”, — dedi Shavkat Mirziyoyev.

Raqamlar ham ushbu fikrlarning amaliy tasdig‘idir. So‘nggi o‘n yillik ikki davlat o‘rtasidagi iqtisodiy hamkorlikda misli ko‘rilmagan yuksalish davri bo‘ldi. O‘zaro tovar ayirboshlash hajmi o‘tgan davrda uch barobardan ko‘proqqa oshib, 4 milliard dollardan 13 milliard dollarga yetdi. Bugungi kunga kelib, O‘zbekiston va Rossiya hamkorligidagi investitsion loyihalar portfelining umumiy qiymati 50 milliard dollardan ortiq mablag‘ni tashkil qilmoqda.

Shu bilan birga, hududlararo hamkorlik ham iqtisodiyotning haqiqiy lokomotiviga aylandi. Ayni paytda hayotga tatbiq etilayotgan hududlararo loyihalar hajmi 5 milliard dollarga yetgan bo‘lsa, yaqin istiqbol uchun yana xuddi shuncha miqdordagi, ya’ni 5 milliard dollarlik yangi investitsiya paketi hozirlanmoqda.

Aholi salohiyati haqida gapirar ekan, Prezident yosh, faol va tez ko‘payib borayotgan aholi mamlakatning uzoq muddatli poydevori bo‘lib, tadbirkorlik, sanoat, servis va yuqori texnologiyalarni rivojlantirishda asosiy kuch bo‘lishini qayd etdi. Biroq erishilayotgan iqtisodiy o‘sish shunchaki raqamlarda emas, balki barqaror, inklyuziv va eng muhimi, har bir insonning hayot sifatini yaxshilashga xizmat qilishi shart. Buning uchun investitsiyalarni faol jalb etish, bozor institutlarini takomillashtirish hamda sog‘lom raqobat muhitini ta’minlash borasidagi ishlar izchil davom ettirilmoqda.

Kelajak atomi

O‘zbekiston yetakchisi mamlakat energetika tizimining salohiyatini oshirish masalasiga alohida e’tibor qaratdi. Birgalikdagi sa’y-harakatlar tufayli mamlakatda elektr energiyasi ishlab chiqarish hajmi 58 milliard kilovatt-soatdan 87 milliard kilovatt-soatga, ya’ni bir yarim barobarga oshishiga erishildi. Strategik rejalarga ko‘ra, 2030-yilga borib jami elektr energiyasi generatsiyasi 120 milliard kilovatt-soatga yetkaziladi. Eng e’tiborli jihati, ushbu umumiy hajmlarning 54 foizi “yashil iqtisodiyot” prinsiplari asosida, ya’ni qayta tiklanadigan energiya manbalari hissasiga to‘g‘ri keladi.

Ushbu sohadagi eng muhim va strategik loyihalardan biri — O‘zbekistonda Rossiya ishtirokida qurilayotgan ilk gibrid atom elektr stansiyasidir. Yaqinda ilk poydevori qo‘yilgan ushbu yirik ob’ekt shunchaki oddiy energiya manbai emas, balki respublika uchun strategik istiqbollarni ochadi.

“Biz uchun bu uzoq muddatli rivojlanish, yangi muhandislik maktabini tayyorlash va ilg‘or texnologiyalarni o‘zlashtirishga qaratilgan loyihadir”, — deya alohida qayd etdi Prezident Shavkat Mirziyoyev.

Bundan tashqari, atom energiyasidan tinch maqsadlarda foydalanish doirasida faqat energetika bilan cheklanib qolmasdan, tibbiyot, qishloq xo‘jaligi, sanoat tarmoqlari va fundamental ilm-fan sohalarida ham keng ko‘lamli qo‘shma dasturlarni amalga oshirish rejalashtirilgan.

Toshkent xalqaro investitsiya forumi

Prezident Shavkat Mirziyoyev forum qatnashchilarini O‘zbekistonda yaratilgan yangi moliyaviy imkoniyatlar bilan tanishishga chaqirdi. Xususan, yangi tashkil etilgan Toshkent xalqaro moliya markazida investorlar uchun joriy etilgan maxsus huquqiy maqom hamda jozibador soliq imtiyozlaridan faol foydalanish taklif etildi. Shuningdek, nufuzli anjuman ishtirokchilari joriy yilning 16-18-iyun kunlari bo‘lib o‘tadigan navbatdagi Toshkent xalqaro investitsiya forumiga taklif qilindi.

O‘zbekiston rahbarining xalqaro anjumandagi nutqi bugungi murakkab davrda davlatlar o‘rtasidagi munosabatlarning bosh mezonini eslatish bilan yakunlandi. Ta’kidlandiki, ochiq va o‘zaro hurmatga asoslangan muloqot bugungi kunda dunyoning barqaror rivojlanishi uchun eng birlamchi shartdir. O‘zaro ishonch, hamkorlikka tayyorlik hamda muammolarga birgalikda yechim izlash bor joyda har doim yangi va istiqbolli imkoniyatlar eshigi ochilaveradi.