Uzayib borayotgan muddat: Trampning maxsus elchisi urushni to‘xtatish uchun yarim yil kerakligini aytdi

AQSh prezidenti Donald Trampning maxsus elchisi Kit Kellog urushni tinch yo‘l bilan hal etish uchun yarim yil kerakligini aytmoqda. Bu haqda The Moscow Times xabar berdi.

Yangi muddat

Dastlab Tramp prezidentlikka kirishgach 24 soat ichida urushni tugatishga va’da bergandi. Kellog shundan so‘ng prezident 2024-yil oxirigacha urushni to‘xtatishi mumkinligini aytgan. Biroq keyinroq bu muddatni 100 kunga cho‘zgan. Endilikda esa u yana yangi muddatni e’lon qilmoqda.

Men barcha tomonlarni jalb qilish uchun oshkora ravishda 180 kunni olaman, dedi Kellog.

U Ukrainadagi urush 2025-yildayoq yakuniga yetishini ta’kidladi. Siyosatchi AQSHning urushayotgan tomonlar o‘rtasida vositachi bo‘lishini, Yevropa esa muzokaralarda ishtirok etmasligini ta’kidladi.

Men muhim ma’lumotlarni to‘plash uchun shu yerdaman. Men diplomatman. Muzokaralar stolida ukrainlar va ruslar — amerikaliklar esa vositachi sifatida bo‘ladi, ta’kidladi Kellog.

U AQSh tomonidan Ukrainani qo‘llab-quvvatlash davom etishini ta’kidladi.

Ammo hozir qotilliklarni zudlik bilan to‘xtatish kerak, deya qo‘shimcha qildi siyosatchi.

“Zaif kelishuv” bo‘lmaydi

Maxsus vakil Ukrainaning Rossiyaga qarshi urushdagi yo‘qotishlari AQSHning Vyetnam va Koreyadagi yo‘qotishlaridan (birgalikda taxminan 94 ming kishi) uch baravar ko‘pligini qayd etdi.

“Tramp buni to‘xtatmoqchi”, deb ta’kidlab o‘tdi maxsus vakil. U, shuningdek, Tramp Ukraina manfaatlarini e’tiborsiz qoldirmasligini, shuning uchun “zaif kelishuv” bo‘lmasligini aytdi.

Kellog jarayonni tezlashtirish uchun muzokaralar ikki yo‘nalishda — Rossiya va Ukraina-ittifoqchilar yo‘nalishida olib borilayotganini bildirdi. U Amerika—Ukraina—ittifoq yo‘nalishida ishlashi, Rossiya tomoni bilan esa AQSH prezidentining Yaqin Sharq bo‘yicha maxsus vakili Stiv Uitkoff shug‘ullanishini ta’kidladi.