Endi bahonalar o‘tmaydi: Maktablarda davomatni kameralar nazorat qiladi

So‘nggi paytlarda maktablarda o‘quvchilar davomati kameralar orqali tekshirilishi haqidagi gaplar ko‘pchilikni qiziqtirib qo‘ydi. Bu xabar ota-onalar va o‘quvchilar orasida turli savollarni keltirib chiqardi. Vazirlik ham bu masalaga aniqlik kiritdi. 

Xo‘sh, kameralar avval qayerlarda o‘rnatiladi?

Kameralar o‘rnatilishining sababi

Vazirlik ma’lumotiga ko‘ra, “aqlli” kameralar hozircha barcha maktablarda emas, faqat Toshkent shahrining Mirzo Ulug‘bek tumanidagi ayrim maktablarga sinov uchun o‘rnatilmoqda. Bu tizim o‘quvchilarning darsga kelgan-kelmaganini aniqlashni osonlashtirib, maktab ma’muriyatiga yordam beradi. Shu bilan birga, ota-onalar ham farzandining darsga qatnashayotganini onlayn tarzda kuzatishi mumkin bo‘ladi.

Bu tashabbus aslida 2025-yil 29-avgustdagi Toshkent shahar hokimi qaroriga asoslangan bo‘lib, unga ko‘ra 10–11-sinflarga kameralar o‘rnatish va “Smart School” tizimini joriy qilish rejalashtirilgan. Bu orqali o‘quvchilarning davomatidan tashqari, ularning fanlarga qiziqishi va ta’lim sifati ham kuzatib boriladi.

Hozirgi tartib qanday ishlayapti?

Hozirda o‘quvchilarning davomatini nazorat qilish tizimi allaqachon bor. 2025-yil 18-sentyabrdagi qo‘shma qarorga ko‘ra, Maktabgacha va maktab ta’limi vazirligi, Ichki ishlar vazirligi, Mudofaa vazirligi hamda Mahallalar uyushmasi birgalikda tasdiqlagan nizom asosida har kuni davomat “e-maktab” platformasida o‘qituvchilar va sinf rahbarlari tomonidan belgilanadi.

Agar o‘quvchi sababsiz dars qoldirsa, maktabdagi inspektor-psixolog uning ota-onasiga rasmiy ogohlantirish xati yuboradi. Bu xatda bolani maktabga muntazam yuborish zarurligi eslatiladi va agar bu talab bajarilmasa, qonuniy choralar ko‘rilishi mumkinligi haqida ogohlantiriladi.

Dars qoldirganlar uchun javobgarlik ham bor

Agar o‘quvchi doimiy ravishda dars qoldirsa, bu faqat maktab muammosi bo‘lib qolmaydi. Qonunga ko‘ra, ota-onalar yoki ularning o‘rnini bosuvchi shaxslar ham javobgarlikka tortilishi mumkin. Ma’muriy kodeksning 47-moddasiga asosan, bolani tarbiyalash va o‘qitish majburiyatini bajarmaslik jarimaga sabab bo‘ladi. Bu jarima bazaviy hisoblash miqdorining bir baravaridan besh baravarigacha yetishi mumkin.